काठमाडौं । बलात्कारको आरोप लागेका सिद्धबाबा भनिने कृष्णबहादुर गिरीलाई प्रहरीले अस्पतालको आईसीयूबाटै पक्राउ गरेको छ । उपचारको बहनामा अस्पतालमा आरम गरिरहेका गिरीलाई जिल्ला प्रहरी कार्यालय, सुनसरीको टोलीले सोमबार बिहान ४ बजे विराट नर्सिङहोमबाटै पक्राउ गरेको हो ।

उनलाई पक्राउ गर्दा अनुयायीले अवरोध पुर्याउन सक्ने भन्दै बिहानै आईसीयूबाटै नियन्त्रणमा लिएर सुनसरी लगिएको सुनसरी प्रहरीले जनाएको छ । बलात्कार आरोप लागे पछि गिरी हृदयघात भएको भन्दै आइतबारदेखि विराट नर्सिङ होममा भर्ना भएका थिए ।

विराट अस्पतालका चिकित्सकका अनुसार, उनलाई ‘माइनर हर्ट अट्याक’ भएको थियो । हेलचेक्रयाइँ गर्दा थप जटिलता आउने भएकाले उनलाई आईसीयूमा राखेर उपचार गरिएको र अहिले सुधार आएको चिकित्सकको भनाइ छ । पक्राउ लगतै उनलाई एम्बुलेन्समा राखेर जिल्ला प्रहरी कार्यालय, सुनसरी पुर्याइएको छ ।