# भर्खरै
Namaste Icon
Ad

टीकापुरमा केरा पकाउने च्याम्बर निर्माण

टीकापुरमा केरा पकाउने च्याम्बर निर्माण

कैलाली । टीकापुरमा केरा पकाउने च्याम्बर निर्माण भएको छ । च्याम्बर निर्माण कम्पनी कर्णाली कृषि सेवा प्रालिले अबको केही दिनमा च्याम्बरमा केरा पकाउन शुरु गरिने जनाएको छ । तीन करोड ५६ लाख ३६ हजार २३६ लागतमा च्याम्बर निर्माण भएको हो । च्याम्बर निर्माणका लागि रानीजमरा कुलरिया सिँचाइ आयोजना कृषि कार्यक्रम कार्यान्वयन एकाइ टीकापुरको एक करोड, ९० लाख, आठ हजार ५९१ अनुदान सहयोग रहेको छ भने निर्माण कम्पनी कर्णाली कृषि सेवा प्रालिको एक करोड, ६६ लाख, २७ हजार, ६४५ लागतमा निर्माण भएको हो ।

च्याम्बर निर्माणका लागि च्याम्बर निर्माण कम्पनी कर्णाली कृषि सेवा प्रालिले २०७६ साल वैशाख १९ गते रानीजमरा कुलरिया सिँचाइ आयोजना कृषि कार्यक्रम कार्यान्वयन एकाइ टीकापुरसँग सम्झौता गरी निर्माणको काम थालनी गरेको थियो । कैलाली केरा खेतीको उर्बर भूमिका रूपमा चिनिन्छ । यहाँ उत्पादन भएको केरा देशैभरि जाने गरेको छ । टीकापुर–२ बन्दीपुरमा निर्माण भएको च्याम्बरको क्षमता १५० मेट्रिक टन रहेको छ । मल्टीप्रपोजका रूपमा प्रयोग गर्न सकिने गरी च्याम्बर निर्माण गरिएको छ । च्याम्बरको भवनमा ३०÷३० मेट्रिक टन क्षमताका पाँच वटा खण्ड रहेका च्याम्बर निर्माण कम्पनी कर्णाली कृषि सेवा प्रालिका सदस्य शिलाकान्त झाले जानकारी दिए । ‘च्याम्बरमा केरा, आँप र पविता एउटै मापदण्डमा समयअनुसार पकाउन सकिन्छ ।’ झाले भने, ‘तापक्रम तलमाथि गरेर त्यसलाई शीतगृहका रूपमा पनि प्रयोग गर्न सकिने छ ।’

आफ्नै गाउँघरमा केरा पकाउने च्याम्बर बन्दा खुशी लागेको केरा व्यवसायी नेपबहादुर चौधरीले बताए । ‘अब हामीलाई केरा पकाउन सजिलो हुने भएको छ ।’ व्यवसायी चौधरी भने, ‘विभिन्न विषादीको प्रयोगमा केरा पकाउँदा स्वास्थ्यलाई असर गर्छ, च्याम्बरमा पकाउँदा मानव स्वास्थ्यका लागि लाभदायक हुन्छ ।’ अर्का केरा व्यवसायी वीरेन्द्र ढुङ्गानाले पनि अहिले बाहिर केरा पठाउँदा समयमै पैसा नआउनाले आफूलाई समस्या भइरहेको बताए । ‘यसरी केरा पकाउने च्याम्बर टीकापुरमै बन्दा सजिलो हुने भएको छ’, ढुङ्गानाले भने, ‘अब किसानको समय पनि बचत हुन्छ । ढुवानी खर्च पनि बचत हुन्छ ।’

केरा व्यापारी यशोदा तिमिल्सिनाले टीकापुरमै उत्पादित केरोले टीकापुरमै पकाएर बेच्न पाउने वातावरण बनेको बताउनुभयो । रानीजमरा कुलरिया सिँचाइ आयोजना कृषि कार्यक्रम कार्यान्वयन एकाइ टीकापुरका कार्यालय प्रमुख भरत कँडेलले बाहिर पकाएको केराभन्दा च्याम्बरमा पकाएको केरा मानव स्वास्थ्यका लागि राम्रो हुने बताए । ‘च्याम्बरमा पकाएको केरा उपभोक्ताका लागि पनि फाइदाजनक हुन्छ’, कँडेलले भने, ‘सिँचाइ आयोजनाले किसानलाई लाभ हुने खालका संरचना निर्माणमा सघाउने गरेको छ ।’ केरा व्यवसायी सङ्घ कैलालीका अध्यक्ष दीपेन्द्र चौधरीका अनुसार अहिले टीकापुर क्षेत्रमा ५०० हेक्टर क्षेत्रफलमा केरा खेती भइरहेको छ । - रासस

Ad

सम्बन्धित समाचारहरु

बिपन्नलाई तरकारी वितरण

बिपन्नलाई तरकारी वितरण

बासुदेब गिरी,प्युठान । प्युठान नगरपालिका ९ गुरिगाउ कोलछापा बस्तीका दैनिक ज्यालादारी काम गरि दैनिकी गुजारा गर्ने बिपन्न परिवारलाई तरकारी वितरण गरिएको छ ।

झरुवारासीका १००० बढी कृषकलाई वडा कार्यालयले बाँड्यो तरकारीको बीउ

सन्तोष दाहाल, ललितपुर । गोदावरी नगरपालिका वडा नं १३ झरुवारासीले वडाभित्र बसोबास गर्ने १००० बढी किसानलाई तरकारीको बीउबिजन वितरण गरेको छ । वडाको नीति तथा कार्यक्रमअन्तर्गत आर्थिक चालु वर्ष २०७६/०७७ मा बिनियोजन गरिएको बजेटबाट नै सबै किसानलाई उक्त बीउबिजन वितरण गरिएको हो ।

Ad

प्रतिक्रिया दिनुहोस

Ad