# भर्खरै
Namaste Icon
Ad

'राजनीतिमा इमान्दारीताको खाँचो छ'

'राजनीतिमा इमान्दारीताको खाँचो छ'
लिखुपिके गाउँपालिका वडा नम्बर ५ का अध्यक्ष ङिमाछिरी लामा

स्थानीय तहको निर्वाचन भएको पनि चार वर्ष पूरा भईसकेको छ । यो समय अवधिमा कति जनप्रतिनिधिहरुले जनतासँग आफूहरूले गरेका प्रतिबद्धता पूरा गरे भने कतिपयले भने यो वा त्यो बहानामा प्रतिबद्धता तोड्दै गए । विकास निर्माणका कार्यहरू त परै जाओस् समाजका अत्यावश्यक काम पनि गर्न बिर्से । कतिपय जनप्रतिनिधि त पैसा पावर र पहुँचको आडमा भ्रष्टाचार गर्न पनि लिप्त भए । अब निर्वाचित जनप्रतिनिधिको समयावधि समाप्त हुन केही महिनामात्रै बाँकी छ । करिब चार वर्षको कार्यकालमा स्थानीय चुनावताका गरेको घोषणा र प्रतिबद्धता कल्ले कति पूरा गरे भन्ने कुरा जनताले प्रत्यक्ष मुल्यांकन तथा लेखाजोखा गरिरहेका छन र गर्ने नै छन । केही जनप्रतिनिधिले भने स्रोत र साधनले भ्याएसम्म सबै प्रतिबद्धता पूरा गरेको दाबी गरेका छन् । प्रस्तुत छ सोलुखुम्बु जिल्लाको लिखुपिके गाउँपालिका वडा नम्बर ५ (साविकको भकान्जे गाविस) का अध्यक्ष ङिमाछिरी लामासँग दिगो विकासलगायत समग्र विषयमा रहेर दर्पण दैनिकका केशर विश्वकर्माले गरेको कुराकानीको सम्पादित अंश:

तपाईंले ४ वर्षको अवधिमा घोषणा गरेका कति काम सम्पन्न गर्नुभयो ?

मैले यो अवधिमा निर्वाचित हुनुभन्दा अगाडी घोषणा पत्रमा उल्लेख गरेको ९५ प्रतिशत काम सम्पन्न गरेको छु । साविकको भकान्जे गाविसको नौवटा वडालाई हाल एउटा वडा बनाएर लिखुपिके गाउँपालिका ५ नम्बर बनाईएको हो । भौगोलिक हिसाबले यो वडा लिखुपिके गाउँपालिकाकै सबैभन्दा ठुलो वडा हो । यो वडामा बसोबास गर्ने जनसंख्या पनि छरिएर रहेका छन । शिक्षाको क्षेत्रमा कुरा गर्दा होस्टेल सहितको चन्द्रज्योति माध्यमिक यो गाउँपालिकाकै पहिलो हो । होस्टेल वडाको बजेटबाट बनेको त होईन । तर वडाको अगुवाइ तथा पहलमा होस्टेल संचालन गरेका छौँ । होस्टेल बनाउने सम्झौतामा भने केही रकम यो वडाले पनि सहयोग गर्ने भनेका थियौं । तर पछि होस्टेल बनाउने स्टेएट स्कुल नामक सँस्थाले नै सबै लगानी गरेर बनायो । वडासँग समन्वय राम्रो भएको कारण उक्त सँस्थाले वडालाई धन्यवाद दिएको छ ।

 

यो वडाको स्वास्थ्य क्षेत्रको स्थिति कस्तो छ ?

हाम्रो वडामा छिरिङखर्क स्वास्थ्य एकाई, भकान्जे स्वास्थ्य चौकी र किन्जा स्वास्थ्य इकाई गरेर तीनवटा स्वास्थ्य सँस्थाहरु छन । छिरिङखर्क र किन्जा स्वास्थ्य ईकाइमा पहिलाई नै स्वास्थ्य भवनहरु थिए । त्यहाँ स्वास्थ्य कर्मचारीहरुको व्यवस्थापन गरेका छौँ । तर भकान्जेमा भने स्वास्थ्य चौकीको भवन भएता पनि भूकम्पले असर पारेको थियो । हामीले संरचनाभन्दा पनि सेवा ठूलो कुरा हो भनेर पुरानो स्वास्थ्य चौकीको भवन नजिकै अर्को भवन बनाएर स्वास्थ्य सेवा अगाडी बढाईरहेका छौँ । मलाई लाग्छ सम्भवतः यो भवन गाउँपालिकाकै गुणस्तर भवन हो ।

 

सडक निर्माण कति भयो नि ?

म स्थानिय तहकाे वडामा निर्वाचित भएर आएपछि यस वडाभरीमा करिब १ सय किलोमीटर भन्दा बढी सडक ट्र्याक खोलिएको छ । केही ठाउँमा थोरथोरै ग्राबेल पनि गरिएको छ । भौगोलिक विकटता र पातलो बस्ती भएर एकदुई ठाउँमा सडक निर्माण हुन सकेको छैन । यहाँका जनताको पहिलो माग नै सडक निर्माण रहेको छ । ४/५ घर भएको र पाँच सय मिटर टाढासम्म पनि सडकको ट्र्याक खोलेका छौँ । सोलुदुधकुण्ड नगरपालिका जोड्ने सडक लामाजुरा भञ्ज्याङ्सम्म पुगेको छ । अब ट्याम्ज्याङ र छ्याङतारे भन्ने ठाउँमा सडक पुर्‍याउनु छ । जम्माजम्मी ४ किलोमिटर जति मात्रै सडक खन्न बाँकी छ । मैले मेरो वडामा स्थानीयसँग राम्रो समन्वय गरेको छु । दीर्घकालीन विकासलाई ध्यानमा राखेर काम गरेको छु । ३/४ घर भएको र ४/५ सय मिटर मात्रै दुरी भएको ठाँउमा हालसम्म बाटो पुगेको छ । यदि कुनै ठाउँमा बाटो नपुगेको भए वडामा मुद्दा हल्दा पनि हुन्छ् । अर्थात मिडिया वा जनतामार्फत बाहिर ल्याए पनि हुन्छ ।


खानेपानीको अवस्था कस्तो छ ?

हामीले एक घर एक धाराको योजना अगाडी बढाएका छौं । यो एकघर एकधाराको कार्यक्रम बाक्लो बस्ती भएको ठाउँमा प्राथमिकता दिएर काम सुरु गरेका छौँ । यसै वडाको छिरिङखर्क, पातल, भाकान्जे, मार्बु, सेटे, किन्जा आदि ठाउँमा खानेपानीको योजना पुगेको छ । यदि कुनै एकघरमा खानेपानीको धारा छुटेको रहेछ भने पनि मेरै पालामा पुर्‍याउनेछु ।

 

संचार क्षेत्रको अवस्था कस्तो छ ?

साविकाको भकन्जे गाविस वडा एक वा हालको लिखुपिके गाउँपालिका ५ अन्तर्गत छिरिङखर्कमा म निर्वाचित हुनुभन्दा अगाडी नै नेपाल टेलिकमको टावर थियो । म निर्वाचित भैसकेपछि छिम्बु भन्ने स्थानमा मोबाईल नेटवर्क स्थापना गरेका छौँ । गाउँपालिकामै दुईवटा टावर भएको वडा यही हो । त्यसकारण पनि यो वडा सञ्चार क्षेत्रमा अगाडी छ । छिरिङखर्कको टावरमा फोरजी जोड्ने तयारी गरिरहेका छौं । तर यो काम अलि झन्झटिलो र असजिलो काम हो । यसको लागि नेपाल टेलिकमको केन्द्रीय कार्यालय काठमाडौमा निवेदन दिएर कार्यालय प्रमुखसँग पटकपटक बैठक पनि बसेका छौँ । पहिला विधुतको अवस्था र त्यसको रिपोर्ट पठाउनुपर्ने हुँदोरहेछ । त्यसपछि यहाँको पूर्वाधार तथा संरचनाले फोरजी राख्न मिल्छ मिल्दैन अध्ययन गर्नुपर्ने रहेछ । त्यो पनि हामीली गरिसकेका छौं । गत भदौमा फोरजीको लागि नेपाल टेलिकमकै केन्द्रिय कार्यालयमा गएर बैठक बस्यौं । अब चाडैं नै गर्ने प्रतिबद्धता जाहेर भएको छ । सबै क्षेत्रबाटो पहलकदमी भैरहेको छ ।

 

के यस वडाका सबैले विधुतको सुविधा पाएका छन् त ?

मेरै कार्यकालमा आफैंले विधुत उत्पादन गरेर आफ्नै वडामा सर्वसुलभ महशुल तिरेर जनताले विधुत उपभोग गरेको वडा सायदै यही होला । यस वडाको प्रायः सबै ठाउँमा विधुत पुगेको छ ।

 

समस्या केके छन् नि ?

छोटोमा समस्या भन्नुपर्दा जनताको आवश्यक धेरै छ तर स्रोतसाधन कम छ । तर पनि मेरो क्षेत्र अधिकारभित्र रहेको काम कर्तव्य म वडाको अभिभावक भएको नाताले समस्या समाधानका लागि सबै प्रकारको पहल गरेको छु  । अलि बढी जसो आउने समस्या भनेको नागरिकता र जन्मदर्ताको हो । त्यो पनि कानुनसम्मत रही सम्बन्धित ठाउँमा समन्वय गरेर समाधान गर्ने गर्दछौं ।

 

केन्द्रीय राजनीतिको खिचातानी अथवा अन्य कार्यक्रमले वडा राजनीतिमा कत्तिको असर वा प्रभाव पार्दो रहेछ ?

केन्द्रीय राजनीतिले वडा तहको राजनीतिमा केन्द्रको भन्दा बढी असर प्रभाव पार्छ । लोकतान्त्रिक पार्टीमा प्रतिस्पर्धा हुनुपर्छ । तर स्वच्छ प्रतिस्पर्धा भएको देखिदैँन । हार अस्वीकार गर्ने प्रवृति बढ्दै गएको छ । राम्रोसँग सिस्टम बसेको छैन । बसेको भएपनि सिस्टम नमान्ने गरेको देखिन्छ । यसले गर्दा केन्द्रीय राजनीति, प्रदेश राजनीति, जिल्लाको राजनीति र स्थानीय तहको राजनीति कता जान्छ भन्ने कुरा नबुझ्नेहरुलाई चाहिँ अप्ठ्यारो परेको देखिन्छ । राजनीतिमा इमानदारीताको आवश्यक हुन्छ । इमान्दारीताको कारण नै म निर्वाचित भएको हुँ । निर्वाचन अगाडि घोषणापत्रमा उल्लेख गरेका र मैले बोलेको कुरा सबै पुर्‍याएको छु । राजनीति भनेको जनतासँगकाे सम्बन्ध हो । सिद्धान्त र विचार आफ्नो ठाउँमा हुन्छ । झन् स्थानीय तहमा राजनीति व्यक्तिगत व्यक्तित्वमा भर पर्छ । म उमेरमा सानो भए पनि व्यवहारमा परिपक्व छु । व्यवहारमा परिपक्व भएकै कारण छोटो समयमै राजनीतिमा फर्को मार्न सफल भएको छु ।

 

विशेष योजना केही छ ?

वडा कार्यालयको भवन निर्माण गर्ने, सडक, बत्ति र पानी नपुगेको ठाउँमा पुर्‍याउने, भएको सडकको स्तरोन्नति गर्ने नै अबको मुख्य योजनाभित्र पर्छ ।

 

पाँच नम्बर वाडाले कृषिमा दिएको छ कि ?

महत्त्वपूर्ण प्रश्नको लागि धन्यवाद छ । स्थानीय तहको वडमध्यमा एक गाउँ एक उत्पादन गर्ने वडा भकान्जे नै हो । यहाँ चिया खेती छ । चिया खेतीमा झन्डै ६०/६५ प्रतिशत जनता जोडिएका छन । चियाखेतीका लागि गाउँपालिकाले डेढलाख अनुदान रकम छुट्यकेको छ । भौगोलिक बनावट अनुसार तल्लो भुभागमा बस्ने जनताहरु अलैंची खेतीमा जोडिएका छन । मौसम अनुकुल हावापानीलाई मध्यनजर गर्दै यस वडाले कृषि उत्पादनलाई पनि जोड दिएको छ ।

 

आगामी चुनावमा तपाईंको उम्मेदवारी हुन्छ कि ?

मेरो विचारमा चुनाव आउनु छ महिना अगाडी नै उम्मेदवार दिन्छु, यो गर्छु, त्यो गर्छु भन्ने मान्छे काँचो हो । ताकि मेरो सन्दर्भमा भन्नुपर्दा त्यो अवस्थामा समय परिस्थितिले के देखाउँछ त्यही अनुसार अगाडी बढौँला ।

 

अन्त्यमा,
हरेक स्थानीय तहमा वडाको वस्तुस्थिति बुझेर मात्रै विकास निर्माणका कार्यहरू अगाडी सार्नुपर्छ । म दीर्घकालीन विकासमा ध्यान दिन्छु । दीर्घकालीन सोच र योजनानुसार काम गर्छु । मेरा पालामा भएका कामहरू एकदुई सय वर्ष सम्म हुन भन्ने मेरो विचार हो । म बोलेर भन्दा पनि काम गरेर बोल्ने व्यक्ती हुँ ।

Ad

सम्बन्धित समाचारहरु

राज्य संचालन गर्न सक्ने क्षमतावान विद्यार्थी उत्पादन गर्छु : ल्हाक्पा शेर्पा

लिखुपिके गाउँपालिका वडा नम्बर ५ मा रहेको श्री चन्द्रज्योति माध्यमिक विद्यालयमा १ सय ७१ जना विद्यार्थी अध्ययनरत छन् । विस २०६४ सालसम्म कक्षा ८ सम्ममात्रै अध्ययन अध्यापन हुँदै आएको सो विद्यालयमा विस २०६५ सालयता कक्षा ९ र १० पनि संचालन भईरहेको छ । विगत केही समययता उक्त विद्यालयमा ल्हाक्पा शेर्पाले प्रधानाध्यापकको जिम्मेवारी बहन गर्दै आएका छन । शेर्पा नवनियुक्त प्रधानाध्यापक हुन् । हाल सो विद्यालयमा १५ जना शिक्षक शिक्षिकाहरुले अध्यापन गराईहेका छन् । झन्डै दुई वर्षयता कोरोना कहरका कारण भनेजस्तो ढंगबाट पठनपाठन संचालन हुन सकेको छैन । जसले गर्दा कयौं विद्यार्थीको पढाई कमजोर हुँदै गएको छ । सुविधा सम्पन्न ठाँउ र आर्थिक सम्पन्न व्यक्तिका लागि नीजी तथा बोर्डिङ स्कुलले अनलाइन क्लास तथा भौतिक उपस्थितिमै सहजतापूर्वक कक्षा संचालन गरे पनि भौगोलिक विकटता र आर्थिक अभावमा हुर्केका विद्यार्थीका लागि कोरोना महामारीले आफ्नो अध्ययनलाई झनै पछाडी पारेको छ । पछिल्लो केही समययता सरकारले स्वास्थ्य मापदण्ड अपनाएर शैक्षिक सस्थाहरु खोल्न भनेको छ । अहिले अवस्था अनुसार प्रायः सबै विद्यालयहरु खुलेका छन् । प्रस्तुत छ चन्द्रज्योति माध्यमिक विद्यालयका उनै नवनियुक्त प्रधानाध्यापक ल्हाक्पा शेर्पासँग दर्पण दैनिकका लागि केशर विश्वकर्माले गरेको कुराकानीको सम्पादित अंश:

अनेरास्ववियू शैक्षिक आन्दोलनको एउटा बिशाल नेता संगठन हो

नेकपा एमालेको भातृ संगठन अनेरास्ववियुबाट राजनीतिमा प्रवेश गरेका अनेरास्ववियु सुर्खेतका संयोजक धुपेन्द्र शाही संगठनका विभिन्न तहमा जिम्मेवारी बहन गर्दै केन्द्रिय कमिटी सचिवालय सदस्यमा मनोनीत भएका छन । बिगत लामो समयदेखि विद्यार्थी राजनीतिमा सक्रिय भुमिका निर्वाह गर्दै आएका धुपेन्द्र शाहीसंग राजनीतिक तथा पारिवारिक जिवन बिषयमा केन्द्रित रहेर अनेरास्ववियु सुर्खेतका संयोजक धुपेन्द्र शाहीसंग दर्पण दैनिककर्मी खगेन्द्र हमालले गरेको कुराकानीको सारसंक्षेपः

Ad

प्रतिक्रिया दिनुहोस

Ad
Ad