सिड्नी । गैरआवासीय नेपाली संघ अष्ट्रेलियाले हरेक दुई वर्षमा आयोजना गर्ने नेपालको प्रबद्र्धनात्मक नेपाल फेष्टिभल शनिबार हुने भएको छ । शनिबार १९ नोभेम्बरका दिन नेपालीहरुको घना बसोबास रहेको क्षेत्र बरउडको केन्द्र बरउडपार्कमा नेपाल फेष्टिभल गर्न लागिएको हो । नेपाल फेष्टिभलमा नेपाली कला, संस्कृति, पहिरन, वाद्यवादनका साथै खाना, संगीत र पर्यटकीय स्थलहरुको प्रचार गरिनेछ । अष्ट्रेलियाको सिड्नीमै नेपालको झल्को दिनका लागि नेपाल हाउस निर्माण गरिने महोत्सवका संयोजक एवं गैरआवासीय नेपाली संघ अष्ट्रेलियाका उपाध्यक्ष देव गुरुङले सम्पूर्ण तयारी पूरा भएको र शनिबार दिनभर मनोरञ्जनात्मक कार्यक्रमका साथै खानाका स्टलहरु, नेपाली व्यवसायीहरुले पाएको सफलताका कथाहरु नेपाल फेष्टिभलमा हेर्न पाइने बताए ।

औपचारिक उद्घाटन कार्यक्रममा अष्ट्रेलियाका राजनीतिक दलका प्रतिनिधिहरु पनि सहभागी हुनेछन् । कार्यक्रममा सहभागी हुनका लागि नै अष्ट्रेलियाका विभिन्न राज्यबाट समेत नागरिक समाजका अगुवाहरु सिड्नी आइपुगेका छन् ।

अष्ट्रेसलियामा रहेका नेपाली पत्रकारहरुको संस्था अष्ट्रेलियन नेप्लीज जर्नलिष्ट एशोसिएसनका अध्यक्ष चिरञ्जीवी देवकोटाले यस किसिमको कार्यक्रम हरेक शहरमा गरेर यहाँको समूदायमा आफ्नो उपस्थिति जनाउने कार्य उदाहरणीय भएको बताए । उनले भने, 'सन् २००६ बाट एनआरएनहरुले सिड्नीबाटै नेपाल फेष्टिभल सुरु गरेका थिए । अहिले यो सबै राज्यमा फैलिसकेको छ । अष्ट्रेलियाको बहुसांस्कृतिक समाजले यस्ता मेला महोत्सवलाई सम्बन्धित देशको खानाको स्वाद, पहिरन र सांस्कृतिक विविधता बुझ्ने अवसरको रुपमा लिने हुनाले नेपालको पर्यटन प्रबद्र्धनमा महत्वपूर्ण भूमिका खेल्छ । नेपाल गइसकेका अष्ट्रेलियनहरुले नेपालको झल्को यहाँ पाउँछन् भने नेपाल नगएकाहरुले जाने प्रोत्साहन महोत्सवमा पाउँछन् जस्तो लाग्छ ।'

यस पटकको नेपाल फेष्टिभलमा ५५ वटा स्टलहरु राखिएको छ भने यीमध्ये ९ वटा स्टल नेपाली खानाका परिकारहरुको रहेको छ । रेमिट्यान्सका अन्तर्राष्ट्रिय कम्पनी, अष्ट्रेलियाको सरकारी बैंकसहितका व्यापारिक घरानाहरुले नेपाल फेष्टिभलमा आफ्नो उपस्थिति जनाएका छन् । नेपाल फेष्टिभलका उपसंयोजक एवं एनआरएन अष्ट्रेलियाका कोषाध्यक्ष अनिल पोखरेल पछिल्लो समयमा अष्ट्रेलियन समूदायमा नेपालप्रतिको चासो बढेको पाइएको बताउँछन् । उनी भन्छन् 'नेपालीलाई मेहनती भनेर धेरैले चिनेका छन् । काम गर्ने ठाउँमा हाम्रो फेष्टिभल हुँदैछ त्यहाँ नेपाली स्वाद पस्कन्छौं भन्दा उनीहरु मम चाख्न जानुपर्छ भन्दै आउने गर्दछन् । यस्तै नेपाली गीत संगीतले पनि उनीहरुलाई आकर्षित गर्ने गरेको छ ।'

यस पटकको नेपाल फेष्टिभलमा अष्ट्रेलियाका नेपालीमूलका कलाकारहरुका साथै नेपालको चर्चित गायक दिपक बज्राचार्य र रिदम व्याण्ड, गायक प्रकाश सपुत, हाँस्य कलाकार सन्दिप क्षेत्री लगायतको प्रस्तुति समेटिएको छ । मञ्च र सांस्कृतिक कार्यक्रमको संयोजन गरिरहेकी एनआरएन अष्ट्रेलियाको ओसेनिया क्षेत्रीय महिला संयोजक उषा बारिया नेपाल फेष्टिभलमा सहभागी हुने दर्शकहरुले सम्पूर्ण मनोरञ्जन प्राप्त गर्ने बताउँछिन् । उनी भन्छिन् 'अष्ट्रेलियामा अधिकांश नेपालीहरु विद्यार्थीको रुपमा आउनुभयो । उहाँहरु जति नै व्यस्त भएपनि नेपाली गीत संगीतलाई मन पराउनुहुन्छ र त्यसमै रमाउनुहुन्छ । यस पटक हामीले सबै उमेर समूहका नेपालीहरुलाई समेट्नका लागि त्यही अनुरुप कलाकार छनोट गरेका छौं । शनिबार दिनभरि नेपाली गीत संगीतले बरउडको पार्क घन्किनेछ । तपाईंहरुलाई निम्तो छ । सकेसम्म एकजना विदेशी साथी पनि साथैमा लिएर आउनुभयो भने अझ रमाइलो हुनेछ ।'

महोत्सवको सुरुवातमा भने नेपाली पोशाकमा सजिएर विभिन्न झाँकीसहितको नेपाल फेष्टिभल परेड आयोजना गरिनेछ । परेड संयोजक सन्ध्या शाहले कुमारी, शिव पार्वती सहित नेपाली पोशाकमा सैयौं नेपालीले परेडमा सहभागिता जनाउने निश्चित भइसकेको जानकारी दिएकी छिन् ।