.png "Win Recruit Nepal"){kind=logo}
गोरखा । गोरखा नगरपालिकाका कृषकहरूले रासायनिक मलको कोटा बढाउन र प्रदेश सरकारसँग रहेको मौज्दात मल तुरुन्त उपलब्ध गराउन माग गरेका छन् । धान र मकै खेतीको महत्त्वपूर्ण चरण सुरु भइसक्दा पनि माग अनुसारको मल नपाएपछि उनीहरूले यस्तो माग राखेका हुन् ।
गोरखा नगरपालिकामा हाल १०५ वटा कृषि समूह, १६ वटा कृषि सहकारी र २०० भन्दा बढी व्यावसायिक कृषि फार्म सञ्चालनमा छन् । यी संस्था आबद्ध हजारौँ कृषक यतिबेला मलको पर्खाइमा छन् ।
गोरखा नगरपालिकाका कृषि अधिकृत ऋषि रोकाका अनुसार नगरपालिकाको वार्षिक आवश्यकता ५ लाख ५० हजार केजी युरिया, २ लाख ३० हजार केजी डीएपी र १० हजार केजी पोटास रहेको छ । तर, विगतका वर्षहरूमा वास्तविक मागको तुलनामा ४० प्रतिशत मात्र मल प्राप्त हुँदै आएको छ । जसका कारण कृषकहरू बर्सेनि अभाव, लामो लाइन र अनिश्चितताको सास्ती भोग्न बाध्य छन् ।
कृषकहरूका अनुसार मुख्य समस्या मलको तत्कालीन अभाव मात्र नभई जिल्लाका लागि निर्धारण गरिएको कोटा नै निकै कम हुनु हो । कृषकको संख्या, खेतीयोग्य क्षेत्रफल र उत्पादनको सम्भाव्यताका आधारमा हालको कोटा पुनरावलोकन गरी वृद्धि गर्नुपर्ने माग उठेको छ ।
गण्डकी प्रदेश सरकारले स्थानीय तह, कृषि ज्ञान केन्द्र र सम्बन्धित निकायको सिफारिसमा मन्त्रीस्तरीय निर्णय गरेर 'बफर स्टक' बाट थप मल उपलब्ध गराउन सक्ने कानुनी व्यवस्था छ । त्यसैले, अहिले गुनासो मात्र नगरी तथ्यका आधारमा तत्काल पहल गर्नुपर्ने कृषकहरूको जोड छ ।
गोरखा नगरपालिकासहित जिल्लाका सबै स्थानीय तहले वास्तविक माग संकलन गरी तत्काल प्रदेशमा सिफारिस गर्नुपर्ने माग किसानकाे छ । त्यस्तै, कृषि ज्ञान केन्द्र गोरखाले जिल्लाको समग्र आवश्यकता मूल्याङ्कन गरी कोटा वृद्धि र बफर स्टकका लागि प्रदेश मन्त्रालयमा पहल गर्नुपर्ने र गण्डकी प्रदेशको कृषि मन्त्रालयले कृषकको आवश्यकतालाई आधार बनाएर मन्त्रीस्तरीय निर्णयमार्फत थप मल निकासा गर्न माग गरिएकाे छ ।
प्रतिक्रिया गर्न लग इन गर्नु होस्:
Log in with Google