.png "Win Recruit Nepal"){kind=logo}
काठमाडौँ । नेपाल प्रहरीको केन्द्रीय अनुसन्धान ब्युरो (सीआईबी) ले नेपाल इन्भेष्टमेन्ट मेगा बैंकका प्रमुख कार्यकारी अधिकृत (सीईओ) ज्योतिप्रकाश पाण्डेलाई पक्राउ गरेको छ । स्मार्ट टेलिकमको सम्पत्ति लिलामी प्रक्रियामा ठगी तथा आपराधिक विश्वासघात गरेको आरोपमा उनलाई सिन्धुलीबाट नियन्त्रणमा लिइएको हो ।
सीआईबीका अनुसार पाण्डेले प्रयोग गर्दै आएको मोबाइल फोन बन्द गरी भाग्ने प्रयास गरिरहेका बेला मंगलबार राति करिब ८ बजे सिन्धुलीको कमलामाई नगरपालिका–६ बसपार्क क्षेत्रस्थित मदन भण्डारी राजमार्गमा सवारी चेकजाँचका क्रममा उनलाई पक्राउ गरिएको हो । उनलाई जिल्ला प्रहरी कार्यालय सिन्धुलीको सहयोगमा नियन्त्रणमा लिई थप अनुसन्धानका लागि काठमाडौं ल्याइएको छ ।
के हो प्रकरण ?
नेपाल दूरसञ्चार प्राधिकरणबाट २०७० वैशाख २ गते अनुमतिपत्र लिई सञ्चालनमा आएको ‘स्मार्ट टेलिकम प्रा. लि.’ ले नियमानुसार नवीकरण नगरेपछि २०८० वैशाख ३ गतेदेखि यसको अनुमतिपत्र स्वतः रद्द भएको थियो । दूरसञ्चार सेवा प्रदायकको सम्पत्ति व्यवस्थापन नियमावली, २०७९ बमोजिम उक्त कम्पनीको सम्पूर्ण सम्पत्ति, पूर्वाधार र सञ्जाल दूरसञ्चार प्राधिकरणले नियन्त्रणमा लिएको थियो ।
तर, लोन रिकभरी कमिटी (LRC) को अध्यक्ष समेत रहेका ६३ वर्षीय पाण्डेले उक्त सम्पत्ति लिलामी प्रक्रियामा सरकारी हक टुटाउने उद्देश्यले बेइमानीपूर्वक कार्य गरेको सीआईबीको ठहर छ । सीआईबीद्वारा जारी विज्ञप्तिमा भनिएको छ, 'नेपाल सरकारको सम्पत्ति बेइमानीपूर्वक नेपाल सरकारको हक टुटाउने उद्देश्यका साथ कार्य गरी/गराई मुलुकी अपराध संहिता, २०७४ अन्तर्गत ठगी तथा आपराधिक विश्वासघात कसूर गरेको देखिएको छ ।'
४० करोडको आर्थिक अनियमितता
सीईओ पाण्डेमाथि बैंकले २०८२ असोज ३ गते निकालेको लिलामी सूचनाका क्रममा समेत ठगी गरेको आरोप छ । लिलामीको सूचनामा स्मार्ट सेलका उपकरण जडान भएका घरधनीको घरबहाल र विद्युत् महसुलबापतको ४० करोड रुपैयाँ बोलपत्रदाताले थप बुझाउनुपर्ने सर्त राखिएको थियो ।
बैंकले बोलपत्रदाताबाट उक्त रकम असुल गरे पनि हालसम्म सम्बन्धित घरधनी र प्राधिकरणलाई विद्युत् महसुलबापतको रकम भुक्तानी नगरेको प्रहरी अनुसन्धानमा खुलेको छ । "सो रकम बैंकले लिई हालसम्म घरधनीलाई घरबहालका साथै विद्युत् महसुल समेत नदिई/नतिरी ठगी गरेको कसूरमा समेत उनीमाथि अनुसन्धान भइरहेको छ," सीआईबीले जनाएको छ ।
ललितपुर महानगरपालिका–५ मानभवन बस्ने पाण्डेलाई मुलुकी अपराध संहिता, २०७४ बमोजिमको कसूरमा म्याद थप गरी विस्तृत अनुसन्धान अघि बढाइएको प्रहरीले जनाएको छ ।
.jpg)
_GnRvz8QHio.jpg)
.jpeg)
.jpeg)
.jpg)
.jpg)
.jpg)
प्रतिक्रिया गर्न लग इन गर्नु होस्:
Log in with Google