.png "Win Recruit Nepal"){kind=logo}
काठमाडाैँ । भारतको नयाँ दिल्लीका मुख्यमन्त्री अरविन्द केजरीवालले पदबाट राजीनामा दिने घोषणा गरेका छन् । आइतबार आम आदमी पार्टीका कार्यकर्तालाई सम्बोधन गर्दै उनले दुई दिनभित्र पदबाट राजीनामा दिने घोषणा गरेका भारतीय सञ्चारमाध्यमले जनाएका छन् ।
केजरीवालले दिल्लीमा समयभन्दा अगावै निर्वाचन गर्नुपर्ने माग गरे । उनले जनताको फैसला नआएसम्म मुख्यमन्त्रीको कुर्सीमा नबस्ने जिकिर गरे ।
उनले भने, 'मैले देशको संविधान र गणतन्त्र जोगाउन राजीनामा दिएको होइन । अब दुई दिनमा राजीनामा दिन्छु । जनताको फैसला नआएसम्म म मुख्यमन्त्रीको कुर्सीमा बस्ने छैन ।'
गएको शुक्रबार भारतको सर्वोच्च अदालतले १० लाख भारु धरौटीमा रिहा गर्न आदेश दिएपछि मुख्यमन्त्री केजरीवाल जेलमुक्त भएका थिए ।
अरविन्द केजरीवाल शुक्रबार रिहा भएका थिए । त्यहाँको सर्वोच्च अदालतबाट जमानत पाएसँगै १५६ दिन तिहाड जेलमा बिताएर केजरीवाल रिहा भएका हुन् ।
केजरीवाललाई सर्वोच्च अदालतले शुक्रबार जमानत दिएको हो । जमानत मिलेपछि केजरीवालको रिहाइको पत्र तिहाड जेलमा पुर्याइएको थियो । उनी समग्रमा करिब ६ महिना लामो जेल जीवन गुजारेर रिहा भएका हुन् । उनी त्यसअघि करिब २० दिन प्रहरीको हिरासतमा बसे ।
जेलबाहिर आएपछि उनले आम आद्मीका कार्यकर्तालाई सम्बोधन गरे । उनले भने, ‘सबैभन्दा पहिले भगवानप्रति आभारी छ । जसका कारण म जेलबाहिर आउन सकेको छु । जसले मन्दिर, मस्जिद, गुरूद्वारामा प्रार्थना गरे, उनीहरू सबैप्रति आभारी छु । मेरो रगतको एक एक थोपा देशका लागि समर्पित छ।’
उनले जेलबाट निस्किएलगत्तै भारतीय जनता पार्टीप्रति निशाना साँधे । केजरीवालले भने, ‘उनीहरूको जेलले मेरो हौसला र आत्मविश्वास तोड्न सकेन ।’ सर्वोच्च अदालतले मदिरा नीतिसँग सम्बन्धित सीबीआईको मुद्दा प्रकरणमा उनलाई जमानत दिएको हो । अदालतले आफ्नो आदेशमा केजरीवालले १० लाख रुपैयाँ धरौटी तिर्नुपर्ने बताएको थियो ।
न्यायाधीश सूर्यकान्त र उज्ज्वल भुयनको इजलासले उक्त मुद्दाको सुनुवाइ गरेको थियो । सेप्टेम्बर ५ मा फैसला सुरक्षित राखिएको थियो ।
केजरीवालले सर्वोच्च अदालतमा दुईवटा निवदेन दर्ता गरेका थिए । यसमध्ये एउटा निवेदन जमानत नदिनेविरुद्ध थियो । यस मामिलामा सीबीआईको गिरफ्तारीविरुद्ध दोस्रो निवेदन पनि पुगेको थियो ।
सीबीआईले केजरीवाललाई इनकम ट्याक्स डिपार्टमेन्टको हिरासतमा रहेका बेला पक्राउ गरेको थियो । केजरीवाललाई ईडी टोलीले मार्च २०२४ मा पक्राउ गरेको थियो । जुलाई १२ मा, केजरीवालले ईडी मुद्दामा सर्वोच्च अदालतबाट जमानत पाएका थिए ।
तर यो जमानतअघि नै सीबीआईले केजरीवाललाई जुनमा पक्राउ गरेर हिरासतमा लिएको थियो । यहीकारण केजरीवाल जेलबाट बाहिर आउन सकेका थिएनन् ।
लोकसभा चुनावलाई ध्यानमा राख्दै सर्वोच्च अदालतले मे १० मा अ उनलाई चुनाव प्रचारका लागि २१ दिन अर्थात् जुन २ सम्मको अन्तरिम जमानत दिएको थियो ।
यसअघि दिल्लीका पूर्व उपमुख्यमन्त्री मनिष सिसोदियालाई पनि यस मामिलामा जमानत दिइएको थियो । सिसोदिया १७ महिना जेल बसेर रिहा भएका छन् । यसअघि सञ्जय सिंह पनि धरौटीमा छुटेका थिए ।
आम आद्मी पार्टीले केन्द्र सरकार चलाइरहेको भारतीय जनता पार्टीले केन्द्रीय एजेन्सीहरू प्रयोग गरेर विपक्षी नेताहरूलाई झूटा मुद्दामा फसाएको आरोप लगाउँदै आएको छ ।
भाजपाले कानुनको नजरमा सबै समान रहेको भन्दै यस्ता आरोपलाई अस्वीकार गर्दै आएको छ । केजरीवालको रिहाइसँगै विपक्षी इन्डिया गठबन्धनमा पनि उत्साह देखिएको छ।
इन्डिया गठबन्धनका नेताहरू अखिलेश यादवसहितका नेताहरूले केजरीवाललाई खुला संसारमा स्वागत गर्दै सर्वोच्चको निर्णयप्रति सञ्चामाध्यममा खुसी व्यक्त गरेका छन् ।
प्रतिक्रिया गर्न लग इन गर्नु होस्:
Log in with Google