ममता काफ्लेको हत्या अभियोगमा नरेश भट्टमाथि मुद्दा दायर, सुनवाइ ९ महिना सर्याे

दर्पण दैनिक

२० मंसिर २०८१,१५:२८

काठाडौं । अमेरिकामा बेपत्ता पारिएकी नेपाली नर्स ममता काफ्लेको हत्या अभियोगमा अन्ततः श्रीमान नरेश भट्टमाथि मुद्दा दायर भएको छ । श्रीमतीको हत्या गरी शव लुकाएको अभियोगमा नरेश भट्टमाथि नयाँ सुनवाइको मिति तय भएको छ । प्रिन्स विलियम काउन्टी सर्किट कोर्टका एक न्यायाधीशले ३७ वर्षीय भट्टको सुनवाइ सन् २०२५ को सेप्टेम्बर ८ का लागि तय गरेका हुन् ।

शव लुकाएको अभियोगमा भट्टको सुनुवाइ आगामी हप्तादेखि हुँदै थियो । तर सोमबार उनीमाथि पत्नीको हत्याको नयाँ अभियोग चलाइएपछि सुनवाइ ९ महिना पछि सरेको हो । सुनवाइको फैसला आउन करिब चार हप्ता लाग्ने बताइएको छ । कोर्ट टिभीले यो सुनवाइ टिभीमा प्रत्यक्ष प्रसारण गर्न खोजिरहेको छ । प्रिन्स विलयम मेडिकल सेन्टरमा नर्सका रूपमा काम गर्ने ममता अन्तिम पटक जुलाई २७ मा अस्पताल पुगेकी थिइन् ।

लामो समय अफिस नआएपछि उनका सहकर्मीले प्रहरीलाई उनी हराएको खबर गरेका थिए । अगष्ट २ मा प्रहरी ममता र नरेशको घर पुगेका थिए । सोधपुछका क्रममा नरेशले ममतालाई अन्तिमपटक ३१ जुलाईमा भेटेको बताएका थिए । प्रारम्भिक अनुसन्धानपछि ममतालाई बेपत्ता पारेको अभियोगमा प्रहरीले नरेशलाई २२ अगष्टमा पक्राउ गरेको थियो ।

नरेश प्रहरी हिरासतमा छन् । लामो अनुसन्धानपछि ममताको हत्या गरेर नरेश आफैले उनको शव लुकाएको प्रमाण अदालतमा पेस गरिएको थियो । भट्टले छिमेकको आसपासका क्षेत्रमा फोहोरका ठुला झोला फ्याकेको सर्भेलेन्स क्यामराहरूमा देखिएको थियो । अन्य फुटेजमा उनले चक्कु र सफा गर्न प्रयोग गरिने सामान किनेको पनि देखिएको थियो । एउटा दान साइटमा भट्टले रगत लागेको बाथरुमको बाथम्याट दिएको पनि भेटियो ।

भट्ट दम्पतीको घरमा शयन कक्षमा रगतको छिटा पाइएको थियो । दृश्य हेर्दा कसैलाई जमिनमा घिसारेको जस्तो देखिन्थ्यो । घटना लगत्तै भट्टले आफ्नो टेस्ला कार बेचेका थिए भने घर पनि बेच्ने प्रयासमा थिए । नरेश र ममताकी डेढ वर्षकी छोरी छन् । नरेश जेल परेपछि नेपालबाट अमेरिका गएका ममताकी आमा र भाइले छोरीको हेरविचार गरिरहेका छन् ।