.png "Win Recruit Nepal"){kind=logo}
काठमाडौं । राष्ट्रपति रामचन्द्र पौडेलले अशोकराज सिग्देललाई नयाँ प्रधानसेनापतिमा नियुक्त गरेका छन् । सरकारको सिफारिसमा सिग्देललाई राष्ट्रपति पौडेलले भदौ २४ बाट लागू हुने गरी नेपाली सेनाको प्रधानसेतापतिमा नियुक्त गरेका हुन् ।
योसँगै सिग्देल नेपाली सेनाको ४५औँ प्रधान सेनापति बनेका छन् । नेपाली सेनाको परम्परा अनुसार प्रभुराम शर्माले अवकाशमा जानु एक महिनाअघि साउन २४ गतेदेखि बिदा बसेर सिग्देललाई बुझबुझारथ गरेका थिए ।
यसअघि साउन १४ गते राष्ट्रपति रामचन्द्र पौडेलले सिग्देललाई सरकारको सिफारिसमा कायममुकायम प्रधानसेनापतिको जिम्मेवारी दिएका थिए ।
उमेर विवादको छानबिनमा परेपछि उपरथी ताराध्वज पाण्डेले राजीनामा दिएका थिए । त्यसपछि सेनापतिको रोलक्रममा सिग्देल आएका हुन् ।
३७ वर्षदेखि सैनिक सेवामा कार्यरत सिग्देल भैरहवाका हुन् । उनले त्रिभुवन विश्वविद्यालय रणनीतिक अध्ययन र चीनको राष्ट्रिय डिफेन्स युनिभर्सिटीबाट स्नातकोत्तर सकेका छन् ।
