.png "Win Recruit Nepal"){kind=logo}
काठमाडौं । गृह मन्त्रालयले नेपाली कांग्रेसकी नेतृ आरजु देउवा र नेता कृष्णप्रसाद सिटौलालाई पक्राउ गर्न निर्देशन नदिएको बताएको छ । 'उपप्रधानमन्त्री एवम् गृहमन्त्रीज्यूबाट कुनै व्यक्तिलक्षित गरी केही गर्न वा नगर्न कुनै प्रकारको निर्देशन दिएको कुरा भ्रामक, कपोलकल्पित र झुठा भएको व्यहोरा अवगत गराउँछु,' गृहका सहप्रवक्ता केदारनाथ शर्माले बताएका छन् ।
गृहमन्त्री नारायणकाजी श्रेष्ठले कार्यभार सम्हालेसँगै सबै मुद्दामा स्वच्छ, निष्पक्ष र दबाबरहित ढङ्गले अनुसन्धान तथा कारबाही अगाडि बढाउन नेपाल प्रहरीलगायतका सुरक्षा निकायलाई निर्देशन दिएको तर व्यक्तिलक्षित निर्देशन नदिइएको सहसचिव शर्माले उल्लेख गरेका छन् ।
भ्रष्टाचार र अपराध नियन्त्रणलगायतका अनुसन्धान प्रक्रियालाई दबाबरहित बनाई प्रहरी निकायलाई स्वतन्त्रतापूर्वक अनुसन्धान गर्न मन्त्रालयको नेतृत्व तहबाट निरन्तर सहजीकरण र निर्देशन भइरहेको बताइएको छ । सोमबार आर्थिक दैनिकमा 'नक्कली भुटानी शरणार्थी प्रकरणमा आरजु र सिटौलालाई पक्राउ गर्न गृहमन्त्री श्रेष्ठको निर्देशन' शीर्षकमा समाचार छापिएको थियो। उक्त समाचार अन्य केही सञ्चारमाध्यमले पनि छापेका थिए । ती समाचार सामाजिक सञ्जालमा भाइरल बनेका थिए ।
समाचारबारे खण्डन गर्दै मन्त्रालयले पत्रिकालाई पत्र पठाउँदै न्याय निरुपणको क्रममा रहेको विषयका बारेमा कुनै पनि समाचार प्रकाशन गर्दा सम्बन्धित पक्ष वा पदाधिकारीबाट पुष्ट्याई हुने प्रबन्ध मिलाउन संवेदनशील हुन भनेको छ ।
