काठमाडौं । आख्यानकार भानु बोखिमको उपन्यास ‘गोधूलि गीत’ सार्वजनिक भएको छ ।
दश वर्षे सशस्त्र युद्धको पृष्ठभूमिमा लेखिएको उपन्यास शनिबार कवि श्यामल, आख्यानकार नवीन विभास र कवि नरेन्द्रकुमार नगरकोटीले संयुक्त रुपमा विमोचन गरे ।
कार्यक्रममा आख्यानकार विभासले उपन्यास रोल्पाका ईश्वरी बुढामगर, धनबहादुर, कुमार, खड्गबहादुरहरुको जीवनको एक समयको भयानक कथा भएको बताए ।
उनले भने, ‘कसरी ईश्वरी बुढामगरहरु र ईश्वरीका बा धनबहादुरहरु विद्रोह गर्न पुग्छन् ? परिवर्तनको लागि इमानदार मान्छेहरु, जो ससाना सपनाहरु बोकेर युद्धमा सामेल भए, ती कसरी तड्पिए र पिल्सिए ? तिनका जिन्दगीमाथि किताबले प्रश्न गरेको छ ।’
उनले आफ्ना पात्रहरू भयानक संकटबाट गुज्रिएको बताए । कलम प्रकाशनले प्रकाशन गरेको उपन्यासको मूल्य ६९५ रहेको छ ।