.png "Win Recruit Nepal"){kind=logo}
काठमाडौँ । बागमती प्रदेशमा नेवारी र तामाङ भाषालाई यही वैशाख २४ गतेदेखि व्यावहारिक रूपमा सरकारी कामकाजको प्रयोगमा ल्याइने भएको छ । प्रदेशका संस्कृति, पर्यटन तथा सहकारीमन्त्री शैलेन्द्रमान बज्राचार्यले यसबारे जानकारी जानकारी गराएका हुन् । उनका अनुसार वैशाख २४ गते बिहान ९ बजे काठमाडौँको वसन्तपुरमा प्रधानमन्त्री पुष्पकमल दाहाल ‘प्रचण्ड’ले उक्त दुवै भाषा सबै सरकारी कार्यालयमा प्रयोगमा ल्याइने कार्यक्रमको समुद्घाटन गर्नेछन् । उक्त दिन काठमाडौँको वसन्तपुरबाट बिहान ७ बजे विभिन्न वेषभूषा र झाँकीसहितको र्यालीले काठमाडौँ नगरको परिक्रममा गर्ने कार्यक्रम तय भएको छ ।
यसैगरी प्रदेश सरकारले प्रदेशमा नेवाः (नेपाल) र तामाङ भाषा सरकारी कामकाजको भाषा प्रयोगमा ल्याइएको खुसियालीमा २४ गते प्रदेशभर सार्वजनिक बिदा दिने निर्णयसमेत गरिसकेको छ । उक्त भाषा प्रयोगमा ल्याइएको खुसियालीमा हुने कार्यक्रम भव्य रूपमा सम्पन्न गर्न संस्कृतिमन्त्री बज्राचार्यको अध्यक्षतामा ३०५ सदस्यीय आयोजक समिति बनाइएको छ ।
केही महिनाअघि बसेको बाग्मती प्रदेशसभाको बैठकले प्रदेशमा सरकारी कामकाजको भाषाका रूपमा नेवारी र तामाङ भाषाको विधेयक पारित गरेको थियो ।
