.png "Win Recruit Nepal"){kind=logo}
काभ्रे । खानीखोला गाउँपालिकास्तरीय तेस्रो राष्ट्रपति रनिङ शिल्ड प्रतियोगिताको उपाधि कुमारी माध्यमिक विद्यालयले जितेको छ । ८ विद्यालय सहभाग्ी प्रतियोगिताको उपाधि कुमारी मावि जितेको हो । कुमारी माविले १२ स्वर्ण, ९ रजत र २ कास्य गरी कुल २३ पदकसहित उपाधि हात परेको छ । कुमारी माविले लगातार दोस्रो पटक उपाधि हात परेको हो ।
खानीखोला–७ महाँकालमा गत वर्ष दोस्रो रनिङ शिल्डमा ७ स्वर्ण, ८ रजत र २ कांस्य गरी १७ पदकसहित कुमारी माविले नै उपाधि जितेका थिए । तुलनात्मक रुमपा यसवर्ष अघिल्लो रनिङ शिल्डभन्दा अझ सुधार भएको देखिन्छ ।
गाउँपालिकाका अध्यक्ष इन्द्रबहादुर थिङले शिक्षा क्षेत्रमा परिवर्तनको महसुस हुने गरी केही काम गर्ने संकल्पसहित आफू लागिपरेको बताए । उनले खेलकुद क्षेत्रको विकासको लागि विद्यालय स्तरमा राष्ट्रपति रनिङ शिल्ड प्रतियोगितालाई निरन्तर दिने बताए ।
गाउँपालिका उपाध्यक्ष दोर्जेमान जिम्बाले स्थानीयस्तरमा रहेका खेलाडीको प्रतिभा पहिचान र क्षमता अभिवृद्धिका लागि राष्ट्रपति रनिङ शिल्ड आवश्यक रहेको बताए । तेस्रो रनिङ शिल्ड प्रतियोगितासम्म आइपुग्दा यसको औचित्य समेत पुष्टि भएको उनले बताए । उनले उत्कृष्ट प्रदर्शन गर्ने विद्यालयले नै राष्ट्रपति रनिङ शिल्ड हात पारेको बताए ।
प्रतियोगितामा ९ स्वर्ण, ५ रजत र २ कास्य गरी १६ पदक हात पार्दै जनविकास मावि द्वितीय र २ स्वर्ण, २ रजत र २ कांस्य पदक प्राप्त गर्दै बुद्ध मावि तृतीय र १ स्वर्ण, २ रजत र २ कांस्य पदक जित्दै शारदा मावि चौथो हुन सफल भयो ।
प्रतियोगितामा अघिल्लो पटक तेस्रो स्थानमा रहेको जनहित मावि यस पटक पाँचौ स्थामा पुग्दा धार्ने ज्योति मावि भने पदक विहीन बन्यो ।
खानीखोला गापाको प्राविधिक सहायक चक्रबहादुर थापाले प्रतियोगितामा प्रथम हुने विद्यालयलाई नगद १५ हजार रुपैयाँसहित शिल्ड, मेडल र प्रमाणपत्रले पुरस्कृत गरेको बताए । उनका अनुसार द्धितीय, तृतीय हुन सफल विद्यालयलाई क्रशमः नगद १० हजार र ५ हजार रुपैँयासहित सान्त्वना हुने विद्यालय र विद्यागत प्रथम र द्वितीय तथा उत्कृष्ट खेलाडीलाई मेडल, प्रमाणपत्रसमेतले पुरस्कृत गरिएको छ ।
कार्यक्रममा गाउँपालिका अध्यक्ष थिङ, उपाध्यक्ष जिम्बा, वडा अध्यक्ष निशान मोक्तान, कराँते प्रशिक्षक सुरज लामालगायतले विजेता विद्यालय र पदकविजेता खेलाडीलाई पुरस्कार प्रदान गरेका थिए ।
खानीखोला गाउँपालिकाको खेलकुद विकास समितिका संयोजक प्रेमप्रकाश लामाका अनुसार गाउँपालिकाभित्रका ८ विद्यालयले सहभागिता जनाएको प्रतियोगितामा छात्र भलिबल, छात्र र छात्रा दुवैको दौड, हाईजम, लङजम, त्रिपलजम्प, ज्यावलिङ, सटपुट, कराँते गरी ८ विधाका ५९ वटा पदकका लागि दुई सय बढी विद्यार्र्थी खेलाडीले प्रतिस्पर्धा गरेका थिए ।
गाउँपालिका शिक्षा शाखा सहजकर्ता होमबहादुर वाईबाका अनुसार प्रतियोगिता खानीखोला–५ स्थित् ताल्ढुंगामा खानीखोला गाउँपालिकाको आर्थिक व्यवस्थापनमा गाउँपालिकाको खेलकुद विकास समितिले आयोजना गरेका हुन् । उनले प्रतियोगिता हरेक वर्ष फरक–फरक स्थान तथा विद्यालयमा आयोजना गर्दै आएको बताए । प्रतियोगितामा सहभागी सबै विद्यालयको खेलाडीलाई खाजा खर्च समेत व्यवस्था गरिएको थियो ।
.jpg)
प्रतिक्रिया गर्न लग इन गर्नु होस्:
Log in with Google