.png "Win Recruit Nepal"){kind=logo}
सन्ताेष दाहाल, ललितपुर । दक्षिण ललितपुरको महाङ्काल गाउँपालिकाले किसानबाट दुधको कर लिने निर्णय गरेको भन्दै केही दिनदेखी सर्वत्र विरोध र आलोचना भईरहेको छ । विशेष गरी सामाजिक सञ्जालमा नेकपा एमालेका स्थानीय नेताहरुले अन्यत्रका सरकारले कृषि तथा पशुपालनमा अनुदान दिईरहेका बेला महाङ्कालले उल्टै किसानबाट नै लुट्न खोजेको भन्दै विरोध र आलोचना भइरहेकाे छ ।
यसै क्रममा सोमबार गाउँपालिका अध्यक्ष गणेश बहादुर केसीले आफ्नै मतदाता समेतलाई लक्षित गरि सामाजिक सञ्जालमा विगतदेखी गाउँपालिकाको विकास र परिवर्तन नहुनुमा मानसिक रुपमा विक्षिप्त मानिसहरुको हालिमुहाली रहेको भन्दै स्टाटस लेखे । उनले लेखेका छन्,'बिगतमा महाङ्काल किन परिवर्तन हुन सकेन भनेकोत! मानसिक रुपमा बिक्षिप्त मनिसहरुको हालिमुहाली रहेछ र पो ! परिवर्तन गर्नखोजेको सथिहरुलाइ पेट पोल्न थाल्यो ! सुङुरलाइ स्वर्ग !'
उक्त स्टाटस आएदेखी जनप्रतिनिधि भएर आफ्नै मतदातालाई सुँगुर भनेर अपमान गरेको भन्दै सामाजिक सञ्जाल तातेको छ । एमाले महाङ्कालका अध्यक्ष पुरुषोत्तम हुमागाइँले आफ्नै मतदातालाई मानसिक रुपमा विक्षिप्त भन्दै अपमान नगर्न भन्दै जनप्रतिनिधिले जनतालाई विश्वासमा लिएर आफ्ना कुरा बुझाएर कार्यक्रमहरु लागू गर्नुपर्ने भन्दै सामाजिक सञ्जालमै लेखे । उनले भनेका छन्,' 'आफुलाइ विश्वास गरेर मतदान गरेका जनता जनर्दन लाइ लक्षित गर्दै मानसिक रुपमा विक्षिप्त भनेर सामाजिक सन्जालमा तल्लो स्तरको भाषा प्रयोग नगरेकै राम्रो अध्यक्ष ज्यु ! जनप्रतिनिधि हरुले जनता लाइ विश्वासमा लिएर, बुझाएर आफ्नो कार्यक्रम लागु गर्नु पर्यो नि ! जनतालाइ मन परेन भने सभ्य भाषामा शान्ति पुर्ण तरिकाले विरोध गर्न पाउने जनताको अधिकार सुरक्षित छ ।'
एमाले गाउँ कमिटिका सचिव राजकुमार अधिकारीले पनि जनप्रतिनिधिले आलोचना सुन्ने क्षमता राख्नुपर्ने भन्दै लेखेका छन्, ' जनताप्रति उतरदायी सरकार ! लोकतन्त्रको आधारभुत मान्यता हो!आलोचना सुन्नु र त्यसबाट आफुलाई सच्याउनु र सच्चिनु जनप्रतिनिधिको कर्तब्य हो !! उल्टै जनता आलोचित हुनु कस्तो बिडम्बना !' यसैगरी गाउँपालिका प्रमुख केसीको उक्त पोस्टमा अधिकांशले मतदाताको अपमान गर्ने शब्द लेखेको भन्दै विरोध गरेका छन् ।
के भन्छन् केसी ?
सामाजिक सञ्जालमा दुधमा कर लगाउने भन्ने कुरा सर्वत्र चर्चा भएपछी दर्पण दैनिकले गाउँंपालिका अध्यक्ष गणेश बहादुर केसीसँग सम्पर्क गरी वास्तविकता बुझ्ने कोसिस गरेको थियो । कुराकानीका क्रममा अध्यक्ष केसीले वास्तविकतालाई तोडमोड गरी हल्ला फैलाईएकोले आफुले नचाहँदा नचाहेरै पनि स्ट्याटस लेख्न बाध्य भएको बताए । उनले भने,' हात्ती पेल्नु, बुझ नपेल्नु भन्ने नेपाली उखान छ, तसर्थ बुझेर पनि त्यसको बारेमा अपव्याख्या गर्नु दु: खद हो । हामीले महाङ्कालमा दुग्ध व्यवसायीहरु विशेष गरी राजधानी डेरी, नवप्रभात डेरी, जिल्ला दूध संघ लगायत ४ वटा डेरीका महत्त्वपूर्ण मान्छेहरुसँग बसेर,छलफल गरेर टुङ्ग्याएको विषय हो यो । त्यतिले पनि नपुगेर जसले किसानसँग दूध र खुवा किन्छन्,ती सङ्कलक व्यवसायीहरु पनि राखेर छलफल गरी टुङ्ग्याएको विषय हो । छलफलमा हामीले उनीहरुलाई किसानलाई एक पैसा पनि भार पार्यौ भने हामी कारवाही गर्छौँ, महाङ्कालबाट दूध लान वञ्चित गर्नेदेखी जे पनि गर्नसक्छौँ भनेका छौँ । हामीले भनेको गाउँमा दूध सङ्कलन गर्नेले १० पैसा र दूध लिने ठुला डेरी व्यवसायीले १० पैसा गरि २० पैसा गाउँपालिकाको समृद्धिको लागि योगदान गर्नको लागि आग्रह गरेका हौँ । त्यसको सट्टामा तिमीहरुका दूध ढुवानी गर्ने गाडी जुनसुकै बेला जहाँ रोकिए पनि हामीले उद्दार गर्छौँ भनेका छौँ । सोहीअनुसार हामीले काम पनि थालनी गरेका छौँ, कसैको पनि दूध बिग्रने गरि अहिलेसम्म गाडी रोकिएको छैन, रातको १२ बजे भए पनि खोलिएको छ । यो विषयलाई तोडमोड गरी किसानलाई कर लगायो भनेर फोहोरी राजनीतिक हल्ला गरेपछि मैले के गर्नसक्छु ? यो निर्णय हामी कसैले कोठाभित्र बसेर स्वविवेकले निर्णय गरेका होइनौँ, चारै डेरी उद्योगीसँग एकचरण र गाउँमा दूध, खुवा सङ्कलन गर्नेसँग एकचरण छलफल गरि निर्णय गरिएको कुरो हो, जुन कसैले विरोध नगरी एकमतले अनुमोदन गरेको विषय हो ।'
