.png "Win Recruit Nepal"){kind=logo}
ललितपुर । शनिबारदेखिको अ विरल वर्षासँगै आएको बाढी र पहिरोले बाग्मती गाउँपालिकाको प्युटार र आश्राङमा व्यापक क्षति भएको छ । बाग्मती ४ प्युटार निवासी नवराज विकको घरमा गयराती घरमाथिबाट पहिरो जाँदा घरमा भएका सम्पूर्ण नगदसहितका सामान पुरिएका छन् भने ३ वटा खसी र २० वटा कुखुरा मरेका छन् । विकका अनुसार छिमेकीको घरमा रहेकाले मानवीय क्षति हुनबाट जोगिएको छ ।
यसैगरी बाग्मती ६ आश्राङमा रहेको लुकुनीबेँसी र भालुखोलामा आएको बाढीले त्यस क्षेत्रका २० भन्दा बढी घर जोखिममा परेका छन् । आश्राङका वडा अध्यक्ष नारायण बहादुर भोम्जनले दुई खोलामा आएको बाढीबाट त्यहाँ रहेको ह्युमपाईल टालिएर बाढी र खोला बस्तीमा पसेको बताए ।
उनका अनुसार लुकुनीबेँसीमा रहेको प्रहरी चौकी बाढीबाट पूर्णरुपमा पुरिएको छ भने वडा कार्यालय पनि उच्च जोखिममा रहेको छ । आश्राङ लुकुनीका इन्द्रबहादुर भोम्जन र गोबिन्द थापालगायतको घरमा बाढीले क्षति पुर्याएको उनले बताएका छन् । अध्यक्ष भोम्जनले मानवीय र वस्तुभाउ क्षती हुनबाट बचाउन आफूहरु लागिरहेको बताए ।
साथै प्युटार र आश्राङको बाग्मती क्षेत्रमा रोपाइँ गरिएका अधिकांश खेतहरु पनि बाढीले पुरेको छ । वर्षा,बाढी र पहिरोको प्रकोपले गर्दा त्यस क्षेत्रको सडक र विद्युत सेवा समेत अवरुद्ध भएको छ ।
प्रतिक्रिया गर्न लग इन गर्नु होस्:
Log in with Google