गोदावरी मेयर कपमा कीर्तिपुरको सान्दार जित, तारकेश्वर ५–० ले पराजित

दर्पण दैनिक

१९ बैशाख २०८१,०९:४०

ललितपुर । गोदावरीमा जारी प्रथम उपत्यकाव्यापी अन्तर पालिका खुल्ला मेयर कप फुटबल प्रतियोगितामा कीर्तिपुर नगरपालिका क्बार्टरफाइनलमा प्रबेश गरेको छ । गोदावरी नगरपालिकाको वडा नं १० टाहाखेल–झ्यालुन्टारमा अवस्थित गोदावरी बहुउद्देश्यीय रंगशालाको झ्यालुन्टार खेल मैदानमा मंगलबार सम्पन्न एक मात्र खेलमा तारकेश्वर नगरपालिकालाई ५–० गोल अन्तरले हराउँदै कीर्तिपुरले अन्तिम आठमा स्थान बनाएको हो ।

कीर्तिपुरका लागि यमन मर्हजनले ह्याट्रिक गरे भने थप २ गोल इन्द्र बहादुर बस्नेतको नाममा रह्यो । यमनले खेलको ९ औँ, २५ औँ र ४६ औँ मिनेटमा गोल गर्दा इन्द्रले ५६ औँ मिनेट र ७० औँ मिनेटमा गोल गरे ।

ह्याट्रिक गरेका कीर्तिपुरका यमन मर्हजन खेलको म्यान अफ दि म्याच भए । उनलाई तारकेश्वर नगरपालिकाका मेयर कृष्णहरि मर्हजनले ट्रफि र ५ हजार नगदको चेक हस्तान्तरण गरे ।

जितसँगै सेमिफाइनल प्रवेशका लागि कीर्तिपुरले मध्यपुर थिमि नगरपालिकासँग बैशाख २२ गते दिउँसो ३ बजे प्रतिस्पर्धा गर्ने भएको छ ।
मध्यपुर थिमि सोमबार टोखा नगरपालिकालाई हराएर क्बार्टरफाइनलमा पुगेको हो ।

प्रतियोगितामा कीर्तिपुरसँगै मध्यपुर थिमि नगरपालिका, नागार्जुन नगरपालिका, चन्द्रागिरी नगरपालिका, महालक्ष्मी नगरपालिका र दक्षिणकाली नगरपालिका क्बार्टरफाइनलमा पुगीसकेका छन् । उपत्यकाभित्रका १४ वटा पालिकाका १५ वटा टिमले यो प्रतियोगितामा प्रतिस्पर्धा गरिरहेका छन् ।

प्रतियोगिताको विजेता टिमले ५ लाख र उपविजेताले ३ लाख पुरस्कार पाउने छन् । यस्तै अनुशासित टिमलाई ५० हजार तथा उत्कृष्ट गोलकिपर, डिफेन्डर , फर्वाड, सर्बाधिक गोलकर्ता र उत्कृष्ट प्रशिक्षकलाई जनही २५ हजार रुपैयाँ प्रदान गरिनेछ ।