.png "Win Recruit Nepal"){kind=logo}
काठमाडाैँ । मलेसियामा जारी एसीसी पुरुष यू-१६ इस्ट जोन कपको उपाधि नेपालले जितेको छ । क्वालालम्पुरमा भएको फाइनलमा सिंगापुरलाई २ विकेटले पराजित गर्दै नेपालले उपाधि जितेको हो । आज भएको फाइनलमा सिंगापुरले नेपाललाई जितका लागि ११४ रनको लक्ष्य दिएको थियो । नेपालले उक्त लक्ष्य २९ ओभरमा ८ विकेट गुमाउँदै ११७ रन बनाएर पूरा गरेको हो । फाइनलको पहिलो इनिङ्समा नेपालले सिंगापुरलाई ४०.५ ओभरमा ११३ रनमा अलआउट गरेसँगै जितका लागि ११४ रनको लक्ष्य पाएको थियो ।
सामान्य लक्ष्य पछ्याएको नेपालले सुरुवातमे विकेट गुमाएसँगै दबाब झेलेको थियो । सिंगापुरको कसिलो बलिङका कारण निकै दबाब झेलेको नेपालले अन्त्यमा जित हासिल गर्न सफल भएको हो ।
नेपालका लागि जोय थापाले अविजित रहँदे २४ रन जोडे । त्यस्तै अभय यादवले पनि अविजित १० रनको योगदान दिए । ओपनरद्वय परिमार्जन यादवले १३ रन जोड्दा प्रसिद्ध जैसी १७ रनमा आउट भए । सिवांश बजगाईले २० रन जोडे भने शुभम खनालले १८ रनको योगदान दिए ।
सिंगापुरका लागि कपिस वेंकटरमनले ४ विकेट लिए । त्यस्तै युभान पाण्डेले २ विकेट लिँदा वेदांश गुप्ता र आकाश तेजाले १/१ विकेट लिए ।
फाइनलमा सिंगापुरले टस जितेर पहिले ब्याटिङ गर्ने निर्णय लिँदै नेपाललाई फिल्डिङको निम्तो दिएको थियो । जसमा नेपाली बलरहरूले कसिलो बलिङ गर्दै सिंगापुरलाई ११३ रनमा रोकेका हुन् ।
नेपालका तीव्र गतिका बलरद्वय अभय यादव र सुशील बहादुर रावलले ३/३ विकेट लिएसँगै सिंगापुर दबाबमा परेको थियो । त्यस्तै शुभम खनालले २ तथा कप्तान विपिन प्रसाद शर्माले १ विकेट लिए । नेपालले एक विकेट भने रनआउट गराएको थियो ।
सिंगापुरका लागि रोहन अस्टिन अरुनले सर्वाधिक रन बनाए । उनले ८४ बलको सामना गर्दै २३ रन बनाए भने ११ बलको सामना गरेका रियान नेइकले १५ रन जोडे । त्यस्तै आकाश तेजाले १० तथा वेदांश गुप्ताले १२ रन जोडे ।
एउटै समूहमा रहेका नेपाल र सिंगापुरको भेट समूह चरणमा पनि भएको थियो । त्यतिबेला नेपालले सिंगापुरलाई ६ विकेटले पराजित गरेको थियो ।
यो प्रतियोगिताभर नेपाल उच्च लयमा रह्यो । ब्याटिङ र बलिङ दुवैमा नेपालले दबदबा कायम गर्न सफल रह्यो जसका कारण उपाधि चुम्न सफल भएको छ । फाइनलमा पनि नेपालले कसिलो बलिङ गर्यो । तर, अघिल्लो क्रममा ब्याटरहरू सस्तैमा आउट हुँदा नेपाल दबाबमा परेको थियो । तर, उक्त दबाब झेल्दै नेपाल उपाधि चुम्न सफल भएको हो ।
.jpg)
प्रतिक्रिया गर्न लग इन गर्नु होस्:
Log in with Google