काभ्रेकाे चौकोटमा ह्विलचेयर बास्केटबल प्रतियोगिता, मन्त्री लामाले गरे उद्घाटन

दर्पण दैनिक

९ मंसिर २०८०,१२:२४

काभ्रे । काभ्रेकाे पनौती ५ चौकोटस्थित काठमाडौं युनिभर्सिटी हाइस्कुलमा ह्विलचेयर बास्केटबल प्रतियोगिता आयोजना गरिएको छ । विभिन्न दुर्घटनामा मेरुदण्डमा चोटपटक लागेर ह्विलचेयर प्रयोग गरिरहेकाको संस्था मेरुदण्ड पक्षघात संघले प्रतियोगिता आयोजना गरेको प्रतियोगितामा ६ टिम सहभागी भएका छन् ।

प्रतियोगिता उद्घाटन गर्दै बागमती प्रदेशका खानेपानी, उर्जा तथा सिंचाइमन्त्री तीर्थ लामाले अपांगता भएका व्यक्तिहरुले गरेको कार्यक्रमले आफुलाई समेत हौसला मिलेको भन्दै प्रदेश सरकारको तर्फवाट सहयोग गर्ने प्रतिवद्धता व्यक्त गरे ।

जिल्ला समन्वय समिति काभ्रेका प्रमुख दिपक गौतमले प्रतियोगिताले सबैको लागि प्रेरणा दिएको बताए । काभ्रे बहिरा विद्यालयका प्रधानाध्यापक कृष्णप्यारी नकर्मीले तिनै तहका सरकारलाई अपांगताको क्षेत्रमा काम गर्न अनुरोध गरिन् ।

२०७९ सालमा ९ जना मेरुदण्डमा चोट लागि ह्विलचेयर प्रयोगकर्ता मिलेर गठन भएको संघले सो अपांगता भएका व्यक्तिलाई खेलकुदका साथै आत्मनिर्भर, दक्ष बनाउन तालिमका साथै जनचेतना जगाउने काम गर्दै आएको छ ।