यी हुन् सरकार र आन्दोलनरत चिकित्सकबीच भएकाे सहमतिका ६ बुँदा

दर्पण दैनिक

१३ आश्विन २०८०,२१:४४

काठमाडाैं । सरकार र आन्दोलनरहत चिकित्सकबीच ६ बुँदे सहमति भएको छ । शनिबार अबेर सहमति भएसँगै चिकित्सकहरूले आन्दोलनक कार्यक्रम फिर्ता लिएका छन् । पोखराको मणिपाल अस्पतालमा चिकित्सकहरूमाथि कुटपिट भएपछि देशभरका चिकित्सकहरू आन्दोलित भएका थिए ।

शनिबार भएको वार्तामा ६ बुँदे सहमति भएको छ । सहमतिका बुँदाहरू सुरक्षासँग सम्बन्धित रहेका छन् । ऐन कार्यान्वयन गर्ने, कुटपिट गर्नेमाथि कानुनी कारबाही गर्ने, आगामी दिनमा यस्ता घटना हुन नदिन ऐन संशोधनको प्रक्रिया सुरु गर्नेलगायतका सहमति भएका छन् ।

सहमतिपत्रमा निमित्त स्वास्थ्य सचिव डा. दिपेन्द्र रमण सिंह र चिकित्सकहरूका तर्फबाट डा. शेषराज अधिकारीले हस्ताक्षर गरेका छन् । पछिल्ला दिनहरूमा अस्पतालमा बिरामीको मृत्यु भएको विषयलाई चिकित्सकहरूमाथि कुटपिटका घटनाहरू बढिरहेका छन् । मणिपालमा कुटपिट हुनुअघि हटौँडामा पनि चिकित्सकहरूमाथि कुटपिट भएको थियो ।

सहमतिपत्र

नेपाल सरकारका माननीय उपप्रधानमन्त्री तथा गृह मन्त्रीज्यूको समुपस्थितिमा नेपाल सरकार, स्वास्थ्य तथा जनसंख्या मन्त्रालय र स्वास्थ्यकर्मीका लागि सुरक्षित कार्यस्थल सघर्ष समिति बिच भएको सहमती

१. स्वास्थ्यकर्मी तथा स्वास्थ्य संस्थाको सुरक्षा सम्बन्धी ऐन, २०६६ (पहिलो संशोधन २०७९ ) लाई प्रभावकारी रुपमा कार्यान्वयन गरी मणिपाल मेडिकल कलेज लगायतका स्वास्थ्य संस्थाहरुमा चिकित्सक तथा स्वास्थ्यकर्मी र स्वास्थ्य संस्थाको सुरक्षालाई थप भरपर्दो बनाउने । त्यसका लागि स्वास्थ्यकर्मी तथा स्वास्थ्य संस्था सुरक्षा समन्वय समितिलाई समेत क्रियाशिल बनाउने ।

२. चिकित्सक तथा स्वास्थ्यकर्मी र स्वास्थ्य संस्थामा आक्रमण तथा कुटपिट गर्ने व्यक्तिलाई स्वास्थ्यकर्मी तथा स्वास्थ्य संस्थाको सुरक्षा सम्बन्धी ऐन, २०६६ (पहिलो संशोधन २०७९) बमोजिम कारवाही चलाउने । ३. स्वास्थ्यकर्मी तथा स्वास्थ्य संस्थामा कार्यरत कर्मचारीलाई कुटपिट गर्ने घटना बढिरहेको र हालको कानुनी व्यवस्थाले स्वास्थ्यकर्मी तथा स्वास्थ्य संस्थामा कार्यरत कर्मचारीको मनोवलमा ह्रास आएको हुँदा निजहरुको मनोवल वढाउन कुटपिट गर्ने व्यक्तिलाई तीन वर्ष भन्दा वढी सजाय हुनुपर्ने मागका सम्बन्धमा नेपाल सरकारको तर्फवाट प्रतिवद्धता व्यक्त गर्दै सो लयागतका विषयमा कानून संशोधन गर्न स्वास्थ्य तथा जनसंख्या मन्त्रालयले एक हप्ता भित्र प्रक्रिया अघि बढाउने ।

४.चिकित्सक, आवासीय चिकित्सक, मेडिकल अधिकृत, इन्टर्न डाक्टर तथा स्वास्थ्यकर्मीहरुको सेवा, सुविधामा न्यूनतम सरकारी सरह एकरुपता कायम गर्ने लगायत तत्काल सुधार गर्नुपर्ने विषयमा अध्ययन गरी प्रतिवेदन पेश गर्न स्वास्थ्य तथा जनसंख्या मन्त्रालयका अतिरिक्त सचिवज्यूको संयोजकत्वमा अर्थ मन्त्रालय, गृह मन्त्रालय, कानून न्याय तथा संसदीय मामिला मन्त्रालय, श्रम रोजगार तथा सामाजिक सुरक्षा मन्त्रालयका प्रतिनिधि, चिकित्सा शिक्षा आयोग, नेपाल मेडिकल काउन्सिल, नेपाल चिकित्सक संघ र स्वास्थ्यकर्मीका लागि सुरक्षित कार्यस्थल सघर्ष समितिका प्रतिनिधि रहेको समिति १५ दिन भित्र गठन गरी जिम्मेबारी दिने । उक्त प्रतिवेदन अध्ययन गरी त्यसमा उल्लेख भएको मूल मर्म कार्यान्वयनका लागि स्वास्थ्य तथा जनसंख्या मन्त्रालयले आवश्यक कारवाही गर्ने ।

५. स्वास्थ्यकर्मीहरु माथि वारम्बार भइरहेका कुटपिट र दुर्व्यवहारका घटनाको कारक तत्व पहिचान एवं निराकरण गर्न आवश्यक पर्ने नीतिगत र कानुनी सुधारका विषयहरु समेटी प्रतिवेदन पेश गर्न दश दिन भित्र उच्च स्तरीय कार्यदल गठन गरी तीन महिना भित्र प्रतिवेदन पेश गर्ने गरी जिम्मेवारी दिने । उक्त प्रतिवेदन अध्ययन गरी त्यसमा उल्लेख भएको मूल मर्म कार्यान्वयनका लागि स्वास्थ्य तथा जनसंख्या मन्त्रालयले आवश्यक कारबाही गर्ने ।

६. स्वास्थ्यकर्मीका लागि सुरक्षित कार्यस्थल सघर्ष समितिको तर्फवाट सञ्चालन गरेका आन्दोलनका कार्यक्रमहरु आजैका मितिबाट अन्त्य गरी नियमित काममा फर्कने ।