अब अनलाइन सञ्चारमाध्यमको दर्ता र नवीकरण प्रमाणपत्र अब डिजिटल मात्रै

दर्पण दैनिक

४ असार २०८३,१५:२२

काठमाडौँ । सूचना तथा प्रसारण विभागले अनलाइन सञ्चारमाध्यमको दर्ता, नवीकरण तथा विवरण परिवर्तनको प्रमाणपत्र अब पूर्ण रूपमा डिजिटल माध्यमबाट मात्रै उपलब्ध गराउने भएको छ । सरकारको शासकीय सुधार सम्बन्धी १०० कार्यसूची र विभागको 'बिजनेस प्रोसेस रि-इन्जिनियरिङ' (बीपीआर) अनुसार यो व्यवस्था असार १ गतेदेखि नै लागू भइसकेको छ ।

नयाँ व्यवस्था अनुसार अब सञ्चालकहरूले विभागको अनलाइन प्रणाली (ims.doib.gov.np) मार्फत निवेदन पेश गरेकै ठाउँबाट प्रमाणपत्रको डिजिटल कपी प्राप्त गर्नेछन् । विभागले अबदेखि यस्ता प्रमाणपत्रको हार्ड कपी (छापिएको कागज) उपलब्ध नगराउने स्पष्ट पारेको छ ।

यसअघि प्रणाली पूर्ण रूपमा अनलाइनमा आबद्ध भइनसकेका कारण अनलाइन सञ्चारमाध्यमको दर्ता तथा नवीकरण प्रमाणपत्र हार्ड कपीमै जारी हुँदै आएको थियाे । अब भने संस्था, सञ्चालक वा सम्पादक परिवर्तन लगायतका सबै सेवा प्रणालीभित्रै सञ्चालन हुने विभागले जनाएको छ ।

आर्थिक वर्ष २०८३/०८४ का लागि नवीकरण खुल्यो

विभागले आगामी आर्थिक वर्ष २०८३/०८४ का लागि अनलाइन सञ्चारमाध्यमको नवीकरण कार्य समेत प्रारम्भ गरेको छ । आ.व. २०८२/८३ सम्म नवीकरण भइसकेका अनलाइनहरूले आवश्यक कागजातसहित विभागको प्रणालीमार्फत आवेदन दिन सक्नेछन् ।

यस्तै, आ.व. २०८२/८३ का लागि आवेदन दिई कागजात स्वीकृत (Approved) भइसकेका अनलाइन सञ्चारमाध्यमहरूलाई चालु आर्थिक वर्षभित्रै तोकिएको दस्तुर भुक्तानी गर्न विभागले सचेत गराएको छ । समयमै दस्तुर भुक्तान नगरेमा प्रमाणपत्र स्वतः रद्द हुने कानूनी व्यवस्था रहेको सूचनामा उल्लेख छ ।

दर्ताका लागि के के कागजात चाहिन्छन्?

छापाखाना र प्रकाशन सम्बन्धी ऐन, २०४८ तथा नियमावली, २०४९ (दोस्रो संशोधन, २०८२ समेत) अनुसार नयाँ अनलाइन दर्ताका लागि देहायका कागजात आवश्यक पर्ने विभागले जनाएको छ:

निवेदन: नियमावलीको अनुसूची ८ (क) बमोजिम अंग्रेजीमा स्पष्ट डोमेन नेम खुल्ने निवेदन ।

संस्थागत कागजात: संस्था दर्ता प्रमाणपत्र, स्थायी लेखा नम्बर (PAN) वा भ्याट प्रमाणपत्र । १ वर्ष नाघेका संस्थाको हकमा कम्पनी अध्यावधिक पत्र, लेखापरीक्षण प्रतिवेदन (Audit Report) र शेयर लगत विवरण ।

प्रबन्धपत्र तथा नियमावली: अनलाइन पत्रिका, इ-म्यागजिन वा न्यूजपोर्टल सञ्चालन गर्ने उद्देश्य खुलेको हुनुपर्ने (पत्रिकाको हकमा जिल्ला प्रशासन कार्यालयको सिफारिस पत्र) ।

सञ्चालक समितिको निर्णय: डोमेन नेम खुलाएर अनलाइन चलाउने, सम्पादक नियुक्त गर्ने तथा विभागमा दर्ता गर्ने निर्णयसहितको माइन्युट र सञ्चालकहरूको नागरिकता ।

सम्पादकको योग्यता: सम्पादकको नागरिकता र सेवा-सुविधा खुल्ने नियुक्तिपत्र । योग्यताका हकमा आमसञ्चार वा पत्रकारितामा स्नातक तह उत्तीर्ण, अथवा अन्य विषयमा स्नातक भएमा कम्तीमा ५ वर्ष पत्रकारिता गरेको प्रमाणित अनुभव पत्र आवश्यक पर्नेछ । विदेशमा अध्ययन गरेको हकमा समकक्षता निर्धारण (Equivalence) पत्र अनिवार्य गरिएको छ ।

डोमेन विवरण: डोमेन अपडेट रहेको देखिने आधिकारिक 'पब्लिक डोमेन डिटेल्स रेकर्ड' (Whois Record) ।