.png "Win Recruit Nepal"){kind=logo}
काठमाडौँ । सत्तारुढ दल राष्ट्रिय स्वतन्त्र पार्टी (रास्वपा) ले आगामी ७–९ असारमा पहिलो महाधिवेशन गर्ने भएको छ । बुधबार बसेको रास्वपा केन्द्रीय समिति बैठकले आगामी ७–९ असारमा चितवनमा पहिलो महाधिवेशन गर्ने निर्णय गरेको हो । पूर्वसञ्चारकर्मी रवि लामिछानेको नेतृत्वमा ७ असार, २०७९ मा स्थापना भएको रास्वपाले विभिन्न आरोह–अवरोध पार गर्दै पहिलो महाधिवेशन गर्ने निश्चित गरेको हो । रास्वपाले केन्द्रीय समिति भंग गर्दै सोही समितिलाई महाधिवेशन आयोजक समितिमा रूपान्तरण गरेको छ । बैठकले मौजुदा केन्द्रीय समितिलाई महाधिवेशन आयोजक समितिमा रूपान्तरण गर्ने निर्णय गरेको र केन्द्रीय समितिको परिभाषित काम सोही समितिले गर्ने केन्द्रीय सदस्य प्रकाशचन्द्र परियारले जनाए ।
१७ असार, २०७९ मा निर्वाचन आयोगमा दर्ता भएको रास्वपाले स्थापनाको ६ महिनामै ४ मंसिर, २०७९ मा भएको प्रतिनिधिसभा चुनावमा २० सिट जितेर चौथो दलको हैसियत बनाएको थियो । तनहुँ–१ बाट निर्वाचित नेपाली कांग्रेसका सांसद रामचन्द्र पौडेल राष्ट्रपति निर्वाचित भएपछि भएको उपनिर्वाचनमा रास्वपाका स्वर्णिम वाग्ले विजयी भएर प्रतिनिधिसभामा २१ सिट कायम गरेको थियो । गत २१ फागुनमा भएको चुनावमा १८१ सिटसहित नेपालको सबैभन्दा ठुलो दल बनेको रास्वपाकै नेतृत्वमा हाल सरकार सञ्चालनमा छ । रास्वपाको पहिलो महाधिवेशनलाई निकै महत्वका साथ हेरिएको छ ।
सभापति रवि लामिछाने नागरिकता, सहकारी ठगी लगायत विवादमा मुछिएसँगै स्थापनाकालदेखि नै रास्वपा ढुक्कका साथ संगठनात्मक गतिविधिमा लाग्न पाएको छैन । यद्यपि ७६ जिल्ला र ७५३ मध्ये ५६० वटाभन्दा बढी पालिकामा रास्वपाले संगठन विस्तार गरिसकेको छ । रास्वपा विधानअनुसार राष्ट्रिय महाधिवेशन प्रत्येक ५ वर्षमा हुने व्यवस्था छ । विधानको व्यवस्थाअनुसार रास्वपाको राष्ट्रिय महाधिवेशन ७ असार २०८४ सम्म गरिसक्नुपर्ने भए पनि पार्टी एकताबाट आएका नेताहरूलाई व्यवस्थापन गर्दै सुदृढ संगठनका लागि अघि बढ्नुपर्ने भएकाले त्यसअघि नै महाधिवेशन तय गरिएको हो ।
रवि लामिछाने नेतृत्वको रास्वपामा १४ मंसिर, २०८२ मा विवेकशील साझा पार्टी समाहित भएको थियो भने १३ पुसमा काठमाडौँ महानगरका तत्कालीन मेयर वालेन्द्र शाहसँग एकता गरेसँगै रास्वपाले ठुलो आकार लिएको हो । वालेन्द्रलाई प्रधानमन्त्रीको उम्मेदवार बनाएर चुनावमा गएको रास्वपा जनताबाट अनुमोदित भएर उनैको नेतृत्वमा सरकार बनेको हो । हाल रास्वपामा संस्थापक, विवेकशील साझा र बालेन समूहबाट आएकाहरू छन् । महाधिवेशनबाट एकताबद्ध पार्टी बनाउन रास्वपा पंक्ति लागिपरेको हो । गत २३ र २४ भदौमा भएको जेनजी आन्दोलनबाट स्थापित भएका कैयौँ नेताहरू पनि हाल रास्वपामा आबद्ध छन् । रास्वपाले आफूलाई जेनजीको प्रतिनिधि पार्टीको रूपमा पनि चित्रित गर्ने कोसिस गरेको छ ।
1679298112.jpg)
1674115170.jpg)
.jpg)
1691312161.jpg)
.jpg)
.jpg)
प्रतिक्रिया गर्न लग इन गर्नु होस्:
Log in with Google