काठमाडाैं । चलचित्र विकास बोर्डको अध्यक्षका लागि ६ जनाले आवेदन दिएका छन् । आवेदन दिने अन्तिम दिन बुधबार साँझसम्म फिल्म निर्देशक तथा सञ्चारकर्मी दिनेश डिसीदेखि नायिका करिश्मा मानन्धरसम्मले अध्यक्षका लागि आवेदन बुझाएका छन् । डिसी र मानन्धरसहित अध्यक्षमा सांस्कृतिक संस्थानका पूर्वमहाप्रबन्धक राजेश थापा, फिल्म निर्देशक दीपा पाण्डे बस्नेत, पूर्व बोर्ड सदस्य प्रकाश भट्टराई र फिल्म निर्माता तथा पूर्व बोर्ड सदस्य अर्जुनकुमार डंगोलको आवेदन परेको छ ।
सञ्चार तथा सूचना प्रविधि मन्त्रालयले १६ साउनमा सूचना जारी गर्दै १५ दिनभित्र आवेदन दिन भनेको थियो । ९ साउनमा भुवन केसीको कार्यकाल सकिएपछि बोर्ड अध्यक्षविहीन छ । सञ्चार मन्त्रालय बोर्डको तालुकदार मन्त्रालय हो । एमाले उपमहासचिव पृथ्वीसुब्बा गुरुङ सञ्चारमन्त्री छन् ।