काठमाडाैं । आगामी वैशाख १५ गतेलाई रिलिज मिति तोक्दै चलचित्र 'कैदीको पत्र' को पहिलो गीत सार्वजनिक गरिएको छ ।
'मेरो दिलको तालमा' बोलको गीतमा प्रताप दास र सुवानी मोक्तानको स्वर छ । गीतको रचना सनम कुमार बैरागले गरेका हुन् भने सुरेश सेञ्चुरीले संगीत दिएका छन् ।
यो गीतको भिडियोमा चलचित्रका प्रमुख कलाकारहरू कुनाल विश्व र ब्रिटिश अभिनेत्री म्याडिसन लाजारसको अभिनय छ । गीतको अंग्रेजी लाइन निखिल गोतामेले लेखेका छन् । कविराज गहतराजले कोरियोग्राफी गरेका छन् ।
प्रेम र रोमान्सको कथामा बनेको यो चलचित्रमा आफ्नो जीवनमा पाएको खुसीलाई सम्हाल्न नसक्दा मानिसले व्यहोर्नुपर्ने उतारचढाव र भोग्नुपर्ने कठिनाइहरू देख्न पाइने निर्देशक सनम कुमार बैरागले बताए । यो चलचित्रको सम्पूर्ण छायांकन स्कटल्याण्डमा भएको हो । यसमा कुनाल र म्याडिसनको साथमा सलिना थापामगर, पृथ्वीराज खत्री, सुवर्ण थापा, मनिष श्रेष्ठलगायतका नेपाली तथा ब्रिटिश कलाकारको अभिनय छ । दिल घले, नानी बैराग, कैलाश विश्वकर्मा र हिराल जोशी चलचित्रका निर्माता हुन् ।
यो चलचित्रका डिओपी रामेश्वर कार्की हुन् भने अर्जुन जिसीले सम्पादन र ब्रिटिश कलरिष्ट यासिन एन'चौबीले कलर ग्रेडिङ्ग गरेका छन् ।