उद्योग वाणिज्य महासंघ निर्वाचन : मतगणना आजै

दर्पण दैनिक

२२ बैशाख २०८३,१५:०३

नेपाल उद्योग वाणिज्य महासंघको नयाँ कार्यसमिति चयनका लागि दुईसमूहबीच प्रतिस्पर्धा भइरहेको छ । सोमबार (वैशाख २१) महासंघको ६०औँ वार्षिकोत्सव सम्पन्न भएसँगै मंगलबार बिहान १० बजेदेखि कमलादीस्थित नेपाल प्रज्ञा प्रतिष्ठानमा मतदान सुरु भएको छ । मतदान बेलुका ६ बजेसम्म हुनेछ ।

निर्वाचन सकिएलगत्तै आजै मतगणना गरिने र नतिजा प्रकाशित हुने महासंघको निर्वाचन समितिका निर्वाचन अधिकृत सुमनकुमार केसीले जानकारी दिए । मुख्य निर्वाचन अधिकृत लीलामणि पौडेल र निर्वाचन अधिकृत सुमन निरौला रहेका छन् ।

आगामी नेतृत्वका लागि हेमराज ढकाल र अञ्जन श्रेष्ठ समर्थित छुट्टाछुट्टै प्यानलहरू चुनावी मैदानमा उत्रिएका छन् । श्रेष्ठ महासंघको अध्यक्ष हुँदै छन् । ढकाल भने वरिष्ठ उपाध्यक्षको लागि चुनावी मैदानमा छन् ।

हेमराज समूहलाई अध्यक्ष चन्द्र प्रसाद ढकालको समर्थन

वरिष्ठ उपाध्यक्षका उमेदवार हेमराज ढकालको प्यानललाई वर्तमान अध्यक्ष चन्द्रप्रसाद ढकालको समर्थन रहेको व्यवसायीहरूले बताएका छन् । ढकाल प्यानलले गत फागुन अन्तिम सातातिर उमेदवारी घोषणा गर्दै चुनावी अभियानलाई तीव्र बनाएको थियो ।

वरिष्ठ उपाध्यक्षका उमेदवार ढकाल देशको वर्तमान आर्थिक अवस्था, विश्वव्यापी मन्दी र राजनीतिक अस्थिरताबीच निजी क्षेत्रको मनोबल उच्च बनाउनु आफ्नो मुख्य उद्देश्य रहेको बताउँछन् । उनले अघि सारेका प्रमुख एजेन्डामा, दोस्रो चरणको आर्थिक सुधार, कानुन संशोधन र नीतिगत स्थिरता हुन् ।

उनकाअनुसार, लामो समयदेखि बैंकिङ प्रणालीमा अधिक लगानीयोग्य पुँजी छ । यो पुँजी प्रसारणलाइन, कृषि व्यवसाय, वनपैदावार, जलविद्युत्, पर्यटन र सुरुङमार्गजस्ता क्षेत्रमा लगानी गर्न निजी क्षेत्रलाई खुला गर्ने प्राथमिकता रहनेछ ।

यस प्यानलबाट जिल्लानगर उपाध्यक्षमा उमेश डाल्मिया र कल्पना गैरे, वस्तुगत उपाध्यक्षमा नरेशलाल श्रेष्ठ, एशोसिएट उपाध्यक्षमा ज्योत्सना श्रेष्ठ, महिला कार्यसमिति सदस्यमा अम्बिका शर्मा, जमुना पौडेल र शोभा ज्ञवाली रहेका छन् । यस्तै, कार्यसमिति सदस्य (वस्तुगत) तर्फ सुधीर पराजुली, सुनैना घिमिरे, कृष्णभक्त श्रेष्ठ, दुर्गाप्रसाद सुवेदी, निराजन चलाउने, पशुपतिदेव पाण्डेलगायत रहेका छन् ।

शिवप्रसाद घिमिरे समूहलाई भावी अध्यक्ष अञ्जन श्रेष्ठको समर्थन

अर्कोतर्फ भावी अध्यक्ष अञ्जन श्रेष्ठको समर्थन दाबी गरिएको समूहबाट शिवप्रसाद घिमिरेले वस्तुगत उपाध्यक्षमा उमेदवारी दिएका छन् । यो समूह ‘नयाँ पुस्ता, नयाँ ऊर्जा, सशक्त निजी क्षेत्र सशक्त नेपाल’ भन्ने नाराका साथ निर्वाचनमा होमिएको छ । यस प्यानलका प्रमुख उमेदवारहरूमा एशोसिएट उपाध्यक्षतर्फ प्रवलजंग पाण्डे, जिल्लारनगरतर्फ कृष्णप्रसाद शर्मा र दिलसुन्दर श्रेष्ठ रहेका छन् ।

वस्तुगत कार्यसमिति सदस्यमा कृष्णप्रसाद अवला, विश्वनाथ खनाल, अरनिको राजभण्डारी, एवबहादुर मगर, धनप्रसाद लामिछानेलगायत छन् । यसैगरी, एशोसिएट कार्यसमिति सदस्यतर्फ डोलप्रसाद अधिकारी, दिवस न्यौपाने, प्रियराज रेग्मी, बाबुकाजी कार्की, राजेशकुमार अग्रवाललगायत छन् । महिला सदस्यमा सुनिता न्हेम्हाफुकी (वस्तुगत), अभिज्ञा मल्ल र जुना माथेमा चुनावी मैदानमा छन् ।

उक्त प्यानलका वस्तुगत उपाध्यक्षका उमेदवार घिमिरे निजी क्षेत्रको खस्किएको मनोबल उकास्न आफूहरू मैदानमा उत्रिएको बताउँछन् । उनले अबको नेतृत्व कुरामा होइन, काममा केन्द्रित हुनुपर्नेमा जोड दिँदै निजी क्षेत्रमैत्री नीति र कर सुधारका विषयमा महासंघ औपचारिक टिप्पणीमै सीमित नहुने, आवश्यक परे दबाब सिर्जना गर्ने, संवादलाई निर्णयमा बदल्ने र परिणाम सार्वजनिक गर्ने नेतृत्व आफूहरूले दिने दाबी गर्छन् ।

घिमिरे समूहले महासंघलाई केही व्यक्तिको पहुँचमा सीमित संस्थाबाट रूपान्तरण गरी ‘सदस्य–केन्द्रित साझा शक्ति केन्द्र बनाउनेमा जोड दिने बताएको छ ।