.png "Win Recruit Nepal"){kind=logo}
काठमाडौँ । संचालनमा रहेका २० वाणिज्य बैंकहरुमध्ये गत आर्थिक वर्ष २०८१-८२ मा एक दर्जन भन्दा बढी बैंकहरुको खराब कर्जा बढेको छ । केही बैंकहरुले खराब कर्जा नियन्त्रण गर्न सफल भए पनि धेरैजसोको कर्जा गुणस्तरमा चुनौती थपिएको छ । अर्थतन्त्र सुस्त हुँदा बैंकिङ क्षेत्रको खराब कर्जा बढ्दै गएको हो ।
बैंकहरुले सार्वजनिक गरेको गत आर्थिक वर्षको चौथो चौमासको वित्तीय विवरणअनुसार १३ वाणिज्य बैंकको खराब कर्जा बढ्दा ७ वटाले मात्र घटाएका छन् । उक्त अवधिमा ५ वटाको ५ प्रतिशतमाथि हुँदा ६ वटाको ४ प्रतिशतदेखि ५ प्रतिशतसम्म र बाँकी ९ वटाको ३ प्रतिशतभन्दा कम खराब कर्जा रहेको छ । यस अवधिमा एभरेष्ट बैंकको खराब कर्जा अनुपात मात्रै एक प्रतिशत भन्दा कम रहेको छ ।
बैंकहरुले सार्वजनिक गरेको वित्तीय विवरण अनुसार धेरै बैंकहरुको खराब कर्जा अनुपात (एनपीएल) बढेको छ । वाणिज्य बैंकहरुको औसत खराब कर्जा ४.२२ प्रतिशत कायम भएको छ । अघिल्लो आर्थिक वर्षमा २० वाणिज्य बैंकहरुको औसत खराब कर्जा ३.७३ प्रतिशत मात्र रहेको थियो । एक वर्षको अवधिमा वाणिज्य बैंकहरुको खराब कर्जा ०.४८ प्रतिशत विन्दुले बढेको हो ।
समीक्षा अवधिमा ७ वटा बैंकको खराब कर्जा भने ०.०३ प्रतिशत बिन्दुदेखि ०.६९ प्रतिशत बिन्दुसम्मले घटेको छ । १३ वटा वाणिज्य बैंकको खराब कर्जा ०.०२ प्रतिशतदेखि २.८३ प्रतिशत बिन्दुसम्मले वृद्धि भएको छ । खराब कर्जा बढ्नुको मुख्य कारण उच्च जोखिममा लगानी, फिर्ता नगरेको कर्जा तथा व्यावसायिक असफलतासँग जोडिएको छ । यसले बैंकिङ क्षेत्रमा जोखिम व्यवस्थापनको चुनौती अझ बढाएको छ भने अर्थतन्त्र चलायमान नभएको देखिएको छ ।
गत आर्थिक वर्ष २०८१-८२ को तथ्यांक अनुसार सबैभन्दा कम खराब कर्जा एभरेष्ट बैंकको ०.३८ प्रतिशतमा सीमित भएको छ । यस अवधिमा सबैभन्दा धेरै खराब कर्जा हिमालयन बैंकको ७.२८ प्रतिशत रहेको छ । कुमारी, एनआईसी एशिया, सिटिजन्स, नबिल र लक्ष्मी सनराइज बैंकको तुलनात्मक रुपमा धेरै खराब कर्जा रहेको देखिन्छ । एनआईसी एशिया बैंकले खराब कर्जा झण्डै दोब्बर पुगेको छ । अघिल्लो वर्ष ३.४५ प्रतिशत रहेको खराब कर्जाको अनुपात गत वर्षमा ६.२८ प्रतिशत पुगेको छ ।
बैंक तथा वित्तीय संस्थाहरुले सार्वजनिक गरेको वित्तीय विवरणअनुसार सरकारी लगानी रहेको राष्ट्रिय वाणिज्य बैंक, कृषि विकास बैंकले खराब कर्जा घटाएका छन् । नबिल, एभरेष्ट, चाटर्ड, लक्ष्मी सनराइज, माछापुच्छ्रे बैंकले पनि अघिल्लो आर्थिक वर्षको तुलनामा खराब कर्जा अनुपात झिनो रुपमा घटाएका छन् ।
नेपाल राष्ट्र बैंकले चालु आर्थिक वर्षको मौद्रिक नीतिमा गरेका केही सहज व्यवस्थाले पनि बैंकहरुको खराब कर्जा बापतको नोक्सानी व्यवस्थाको रकम भने घटेको छ । लचिलो नीतिगत व्यवस्था र कर्जा असुलीमा सुधार भएपछि गत वर्ष बैंकहरुको खराब कर्जा बापतको नोक्सानी व्यवस्था पनि घटेको हो ।गत असारसम्म बैंकहरुको कुल नोक्सानी व्यवस्था साढे २८ अर्ब रुपैयाँ राखेका छन । अघिल्लो वर्ष यस्तो व्यवस्था ५५ अर्ब ९८ करोड रुपैयाँ थियो।
गत आार्थिक वर्षमा २० वटा वाणिज्य बैंकले कुल ७१ अर्ब रुपैयाँ खुद नाफा कमाएका छन् । अघिल्लो आर्थिक वर्षको तुलनामा यो करिब ४३ प्रतिशतको वृद्धि हो । २० वाणिज्य बैंकहरुमध्ये १६ वटाको नाफा बढेको छ भने बाँकी ४ वटाको घटेको छ । नेपाल राष्ट्र बैंकले चालु आर्थिक वर्षको मौद्रिक नीतिमा गरेका केही सहज व्यवस्थाले पनि बैंकहरुको नाफा वृद्धिमा टेवा पुगेको हो ।
गत आर्थिक वर्षमा बैंकहरुको लाभांश दिने क्षमता (वितरणयोग्य मुनाफा) २१ अर्ब ६३ करोड रुपैयाँ छ । यसका आधारमा बैंकहरुले औसतमा १३.२९ प्रतिशत लाभांश दिन सक्ने देखिन्छ ।
.jpg)
_GnRvz8QHio.jpg)
.jpeg)
.jpeg)
.jpg)
.jpg)
प्रतिक्रिया गर्न लग इन गर्नु होस्:
Log in with Google