.png "Win Recruit Nepal"){kind=logo}
काठमाडाैँ । राज्य व्यवस्था तथा सुशासन समितिको सभापतिका लागि कांग्रेस सांसद ईश्वरी न्यौपानेको मात्र उम्मेदवारी परेको छ । मनोनयनका लागि मंगलबार दिउँसो १ बजेदेखि ४ बजेसम्मका लागि समय तोकिए पनि सभापतिका लागि न्यौपानेको मात्र उम्मेदवारी परेको प्रतिनिधिसभा सचिव हर्कराज राईले जनाएका छन् ।
संसदीय सुनुवाइ समिति सभापतिबाट राजीनामा दिएर न्यौपानेले राज्य व्यवस्था समितिको सभापतिमा उम्मेदवारी दर्ता गराएकी थिइन् । उनको प्रस्तावका कांग्रेस सांसद रामहरि खतिवडा र समर्थकमा एमाले सांसद कृष्णगोपाल श्रेष्ठ रहेका छन् । न्यौपानेको मात्र उम्मेदवारी परेकाले उनी समिति सभापतिमा निर्विरोध चयन भएकी छिन् । यद्यपि बुधबार उनी निर्वाचित भएको औपचारिक घोषणा हुनेछ ।
यसअघि कुलिङ पिरियड विवादमा रामहरि खतिवडाले राजीनामा दिएका थिए । कांग्रेसको भागमा परेको दुवै समितिमा सभापति बनाउनपर्ने भएपछि बिहान पार्टी सभापति शेरबहादुर देउवाले बैठक राखेर न्यौपानेलाई अघि सारेका थिए ।
को हुन न्यौपाने ?
न्यौपानेलाई नोपाली कांग्रेसमा सभापति शेरबहादुर देउवाको विश्वासपात्रको रूपमा चिनिन्छ । २०१६ सालमा दाङमा जन्मिएकी उनको हाल स्थायी ठेगाना कैलालीको भजनी नगरपालिका हो । उनी २०७९ सालको संघीय चुनावमा समानुपातिक कोटाबाट सांसद बनेकी हुन् ।
उनले २०७९ मा भएको सभामुखको चुनावमा समेत उम्मेदवारी दिएकी थिइन् । संघीय संसदको संयुक्त समिति संसदीय सुनुवाइ समितिको सभापतिसमेत रहेकी न्यौपाने राज्यव्यवस्था समितिकी सदस्य थिइन् ।
न्यौपाने नेपाली कांग्रेसको १२औँ महाधिवेशनदेखि केन्द्रीय सदस्यका रूपमा रहेकी छिन् । उनी २०६४ र २०७० सालको संविधानसभा सदस्य थिइन् । तत्कालीन व्यवस्थापिका संसदमा उनी पार्टीको सचेतक थिइन् । विद्यार्थी आन्दोलनबाट राजनीति सुरु गरेकी उनी नेपाल महिला संघको केन्द्रीय उपाध्यक्ष भइसकेकी छन् ।
कांग्रेसभित्र महामन्त्रीद्वय गगनकुमार थापा र विश्वप्रकाश शर्माको रोजाइमा भने दिलेन्द्र बडू थिए । तर, देउवाले न्यौपानेलाई राज्य व्यवस्थाका सभापति बनाएका हुन् ।
राज्यव्यवस्था तथा सुशासन समितिमा निजामती विधेयकमा ‘कुलिङ अफ पिरियड’ प्रकरणमा रामहरि खतिवडाले राजीनामा दिएपछि उक्त पद रिक्त थियो ।
1679298112.jpg)
1674115170.jpg)
.jpg)
1691312161.jpg)
.jpg)
प्रतिक्रिया गर्न लग इन गर्नु होस्:
Log in with Google