.png "Win Recruit Nepal"){kind=logo}
काठमाडाैँ । नेपाली कांग्रेस बागमती प्रदेश संसदीय दलभित्र असन्तोष चुलिएको छ । कांग्रेसका २१ जना सांसदहरूले हालै प्रदेश संसदीय दलका नेता बहादुरसिंहविरुद्ध अविश्वासको प्रस्ताव दर्ता गरेका छन् । अब बहुमत सदस्यले संसदीय दलकाे नेता फेर्ने भएका छन् ।
तर, उक्त प्रस्तावले लामालाई दलको नेताबाट हटाएपनि, मुख्यमन्त्री पदबाट तत्काल हटाउन संवैधानिक रूपमा सहज भने छैन । संविधानले स्पष्ट पारेको छ कि मुख्यमन्त्री बन्न दलको नेता हुनु आवश्यक छैन, सांसदहरूको बहुमत समर्थन प्राप्त गर्नु नै पर्याप्त हो ।
प्रदेशसभामा स्पष्ट बहुमत नपुगेका दलहरूबीच नयाँ सत्ता समीकरणको सम्भावना खोजिए पनि संविधानको धारा १६८ को उपधारा (२) अनुसार मुख्यमन्त्री बन्न दलको संसदीय नेता हुनु पर्ने बाध्यता नरहेको प्रष्ट हुँदै कंग्रेसकाे नेताहरू बताउछन् ।
उक्त उपधारामा उल्लेख छ– “प्रदेशसभामा कुनै पनि दलको स्पष्ट बहुमत नरहेमा प्रदेशसभामा प्रतिनिधित्व गर्ने दुई वा दुईभन्दा बढी दलहरूको समर्थनमा बहुमत प्राप्त गर्न सक्ने प्रदेशसभा सदस्यलाई प्रदेश प्रमुखले मुख्यमन्त्री नियुक्त गर्नेछन् ।”
संविधानविद्हरूको व्याख्यामा, 'मुख्यमन्त्री नियुक्तिका लागि दलको आधिकारिक नेताबाट सिफारिस आवश्यक छैन, निर्णायक कुरा बहुमत समर्थन हो ।'
कांग्रेसकै एक नेताले भने, 'अझ महत्वपूर्ण पक्ष के हो भने, हालको सरकार एकल दलको होइन, बहुदलीय गठबन्धन सरकार हो । यस्तो अवस्थामा केवल दलभित्रको असहमति वा आन्तरिक मतभेदको आधारमा सरकारको नेतृत्व हटाउन सकिँदैन ।'
यसैबीच, कांग्रेसभित्रको यो गतिविधिलाई आन्तरिक शक्ति संघर्षको रूपमा हेरिएको छ । यद्यपि, मुख्यमन्त्री लामा भने आफ्नो नेतृत्व कायम रहेको, सरकार वैधानिक रूपमा क्रियाशील रहेको र आफूले आवश्यक बहुमतको समर्थन प्राप्त गरिरहेको दाबी गर्दै आएका छन्।
संविधानले यसअघिका दुई वर्षसम्म विश्वासको मत लिने अनिवार्य व्यवस्था नगरेको अवस्था र दलहरूमध्ये कसैले वैकल्पिक बहुमत प्रस्तुत गर्न नसकेको परिस्थितिमा बहादुरसिंहको नेतृत्व हाललाई कायम रहने प्रष्ट देखिन्छ ।
विशेषगरी, विश्वासको मत भनेको सरकार बनाउने वा फेर्ने महत्वपूर्ण प्रक्रिया भए पनि, त्यो तब मात्र आवश्यक हुन्छ जब सरकारको नेतृत्व गरिरहेकाले स्वयं प्रदेश प्रमुखसमक्ष विश्वासको मत लिने प्रस्ताव ल्याउँछन्, वा कुनै दलले सरकार छाडेको औपचारिक जानकारी गराउँछ ।
हालसम्म न कांग्रेसले सरकार छाडेको घोषणा गरेकाे छ, न अन्य कुनै दलले वैकल्पिक सरकार निर्माणको दाबी गरेको अवस्था छ । त्यसैले प्रदेश प्रमुखले नयाँ नियुक्ति गर्ने परिस्थिति निर्माण भएको छैन । दलको नेताबाट हटाउने प्रयास भए पनि बहादुरसिंहको मुख्यमन्त्री पद हाललाइ सुरक्षित देखिन्छ ।
1679298112.jpg)
1674115170.jpg)
.jpg)
1691312161.jpg)
.jpg)
प्रतिक्रिया गर्न लग इन गर्नु होस्:
Log in with Google